Գյուղատնտեսությունը երկրի տնտեսության առանցքային ոլորտներից մեկն է, որն ապահովում է ՀՆԱ-ի 10.4 %-ը (2022 թվականի տվյալներով)։ Գյուղատնտեսության համախառն արտադրանքի 94.2 %-ն ապահովում են շուրջ 317 հազար գյուղացիական տնտեսություններ, որոնցից յուրաքանչյուրին միջինը բաժին է ընկնում շուրջ 1.48 հա հողատարածք։ Հայաստանի Հանրապետության զբաղվածների 21.8 %-ն ընդգրկված է գյուղատնտեսության ոլորտում։

Ագրարային քաղաքականության ուղենշային փաստաթղթերից է 2019 թվականի դեկտեմբերի 19֊ի կառավարության N 1886-Լ որոշմամբ հաստատված ՀՀ գյուղատնտեսության ոլորտի տնտեսական զարգացումն ապահովող հիմնական ուղղությունների 2020-2030 թվականների ռազմավարությունը, որի առաջիկա տասը տարիների տեսլականն է ունենալ կայուն զարգացող, նորարարական, բարձր ավելացված արժեք ստեղծող, բնական պաշարների նկատմամբ հոգատար և շրջակա միջավայրի հետ ներդաշնակ, էկոլոգիապես մաքուր արտադրանք ստեղծող և գյուղում բնակվող մարդու բարեկեցությունը երաշխավորող գյուղատնտեսություն։

ՀՀ կառավարության 2021 թվականի օգոստոսի 18-ի N 1363-Ա որոշմամբ հաստատված ՀՀ կառավարության ծրագրով գյուղատնտեսական քաղաքականության առանցքը լինելու է գյուղատնտեսության ինտենսիվացումը, արտադրողականության բարձրացումը, հողային ռեսուրսների նպատակային և ջրային ռեսուրսների խնայողաբար ու արդյունավետ օգտագործումը, պարենային անվտանգության ապահովման մակարդակի բարձրացումը, անասնաբուծության և բուսաբուծության զարգացումը, արդիական տեխնոլոգիաների ներդրումը, արտադրված արտադրանքի իրացումն ու արտահանման խթանումը, գյուղատնտեսական ամբողջ արժեշղթայում ընդգրկված սուբյեկտների՝ գյուղացիական տնտեսությունների, կոոպերատիվների, գյուղատնտեսական մթերք վերամշակողների եկամուտների ավելացումը։

Գյուղատնտեսության ոլորտում միջնաժամկետ ժամանակահատվածում պետական քաղաքականությունը նպատակաուղղված է լինելու․

• Գյուղատնտեսության ինտենսիվացման մակարդակի բարձրացմանը, առաջադիմական և նորարարական տեխնոլոգիաների ներդրմանը,
• գյուղատնտեսական նշանակության հողերի նպատակային և արդյունավետ օգտագործմանը, չօգտագործվող հողերը շրջանառության մեջ դնելուն և հողերը խոշորացնելուն,
• ոռոգման ջրի օգտագործման արդյունավետության բարձրացմանը,
• գյուղատնտեսական մշակաբույսերի ամբողջական ապահովագրության ներդրմանը,
• գյուղատնտեսությունում տնտեսավարողների համար մատչելի ֆինանսական ռեսուրսների ապահովմանը,
• գյուղատնտեսական տեխնիկայի հավաքակազմի թարմացմանը,
• ինտենսիվ այգեգործության զարգացմանը, բարձրարժեք մշակաբույսերի արտադրության խթանմանը,
• ջերմատնային տնտեսությունների զարգացմանը,
• տեղական սերմարտադրության խթանմանը,
• կենդանիների համարակալման և հաշվառման համակարգի ներդրմանը,
• անասնապահության ոլորտում առաջադիմական տեխնոլոգիաների ներդրմանը, տոհմային անասնաբուծության զարգացմանը,
• ագրովերամշակողների արտադրական կարողությունների հզորացմանը, մթերումների արդյունավետ կազմակերպմանը,
• գյուղատնտեսական արտադրանքի իրացման կառուցակարգերի կատարելագործմանը, մեծածախ շուկաների և լոգիստիկ կենտրոնների ստեղծմանը,
• սննդամթերքի անվտանգության ոլորտի օրենսդրության կատարելագործմանը,
• կենդանիների և բույսերի հիվանդությունների կանխարգելման արդյունավետ համակարգի ներդրմանը և շահագործմանը։