Միջոցառման նպատակն է տնտեսավարողների համար ստեղծել մատչելի ֆինանսական միջոցների հասանելիություն՝ արդիականացնելու արտադրական հնարավորությունները և խթանելու նոր տեխնոլոգիաների ներմուծումը ՀՀ, որը կբերի արտադրվող ապրանքների և մատուցվող ծառայությունների մրցունակության բարձրացման և աշխատանքի արտադրողականության աճի։

Միջոցառման շրջանակներում շահառուներին հնարավորություն է ընձեռնվում ստանալ ՀՀ տարածքում գործող ֆինանսական կազմակերպությունների կողմից տրամադրված ՀՀ դրամով կամ արտարժույթով վարկի/լիզինգի տոկոսադրույքի սուբսիդավորում: Վարկի/լիզինգի առարկա կարող է հանդիսանալ՝ նոր (չօգտագործված) մեքենասարքավորումներ և դրանց բաղկացուցիչ մասեր։

Վարկի/լիզինգի մայր գումարի մարման արտոնյալ ժամանակահատված է սահմանված մինչև 6 ամիս։ Վարկի/լիզինգի տոկոսադրույքի սուբսիդավորման չափը սահմանվում է՝

• Վարկի դեպքում՝ ՀՀ դրամով՝ 6%, արտարժույթով՝ 4%,
• Լիզինգի դեպքում՝ ՀՀ դրամով 8%, արտարժույթով՝ 6%,

Վարկի/լիզինգի սուբսիդավորվող առավելագույն չափը 1․000․000․000 դրամ է, ժամկետները՝

• վարկ/լիզինգի պայմանագիր՝ մինչև 120 ամիս,
• սուբսիդավորում՝ մինչև 42 ամիս։

Ծրագրի առանձնահատկությունները․

1. Փոխկապակցված կազմակերպությունների խմբի դեպքում, եթե խմբի որևէ ընկերություն օժանդակության համար դիմելուն նախորդող 12 ամսվա ընթացքում կանոնադրական կապիտալում կատարել է 200 մլն դրամ և ավել ներդրում, ապա խմբի բոլոր ընկերությունների համար սահմանվում է հավելյալ արտոնություն։ Նշված գործիքի ներքո տրամադրվելիք վարկերի/լիզինգի սուբսիդավորվող մասի առավելագույն գումարը յուրաքանչյուր վարկի/լիզինգի համար սահմանվում է կանոնադրական կապիտալում կատարված յուրաքանչյուր ներդրման հնգապատիկի չափով, բայց ոչ ավելի, քան 10 մլրդ դրամ (արտարժույթով վարկավորման մասնաբաժինը՝ 5 մլրդ դրամին համարժեք դրամ)՝ փոխկապակցված կազմակերպությունների խմբի մեջ ներառված տնտեսավարողների՝ նպատակային ծրագրի շրջանակներում տրամադրված վարկի/լիզինգի սուբսիդավորվող մասի հանրագումարով:
2. Հարկման ընդհանուր համակարգում գործող ընկերությունները, որոնք ներգրավում են վարկ/լիզինգ՝ թվայնացման կամ արտադրողականության խորհրդատվության համար, կարող են ստանալ հավելյալ աջակցություն, եթե՝

• (1) առաջիկա 2 ֆինանսական տարիներից որևէ մեկում արտահանումը 2023-ի համեմատ աճի ≥20% (հաշվի են առնվում ≤10% բաժին ունեցող շուկաները),
• (2) ունեն ISO 9001, իսկ թվայնացման դեպքում նաև ISO 27001,
• (3) և ներգրավված խորհրդատուն/կազմակերպությունը համապատասխանի ծրագրային պահանջներին։

Սամանված պայմանների բավարարման դեպքում, բացի նպատակային ծրագրով նախատեսված վարկի տոկոսադրույքի սուբսիդավորումից, կփոխհատուցվի նաև նշված պայմանները բավարարելու հաջորդող ամսվա 1-ի դրությամբ վարկի մնացորդային գումարի 50%-ը՝ կազմակերպության կողմից նշված պայմանների համապատասխանությունը հավաստող տեղեկատվությունը տրամադրելուց հետո: Սույն մասով նախատեսված հավելյալ փոխհատուցմանը նախորդող տարվա ֆինանսական հաշվետվությունները պետք է ուղեկցվեն այնպիսի աուդիտորական կազմակերպության եզրակացությամբ, որի տարեկան շրջանառությունը գերազանցում է 400 մլն դրամը և ներգրավվող փորձագետը կամ խորհրդատվական կազմակերպությունը պետք է համապատասխանի ծրագրով սահմանված պահանջներին։

Միջոցառման թիրախներն են հետևյալ ոլորտներում գործունեություն իրականացնող տնտեսավարող սուբյեկտները․

• C (ՍԻ) «Մշակող արդյունաբերություն»,
• B (ԲԻ) «Հանքագործական արդյունաբերություն եվ բացահանքերի շահագործում»,
• D(ԴԻ) «Էլեկտրականության, գազի, գոլորշու եվ լավորակ օդի մատակարարում»,
• J (ՋԵՅ) «Տեղեկատվություն եվ կապ»,
• F (ԷՖ) «Շինարարություն»,
• G45.2(ՋԻ) «Ավտոմեքենաների տեխնիկական սպասարկում և նորոգում»,
• H (ԷՅՋ) «Փոխադրում եվ պահեստային տնտեսություն»,
• I 55 (ԱՅ) «Կացության կազմակերպում» (բացառությամբ Երևան քաղաքի վարչական սահմաններում կացության կազմակերպման գործունեություն իրականացնող տնտեսավարողների,
• M (ԷՄ) «Մասնագիտական, գիտական եվ տեխնիկական գործունեություն»,
• N77 (ԷՆ) «Վարձույթ և լիզինգ»,
• P (ՓԻ) «Կրթություն»,
• Q (ՔՅՈՒ) «Առողջապահություն եվ բնակչության սոցիալական սպասարկում»,
• R (ԱՌ) 90 «Ստեղծագործական, արվեստի և հանդիսադիր ներկայացումների կազմակերպման բնագավառում գործունեություն։

Դիմելու կարգ

Ծրագրի շահառու դառնալու համար անհրաժեշտ է դիմել գործընկեր ֆինանսական կառույց.

• Ֆինանսական կառույցը՝ իր ընթացակարգին համապատասխան ձևակերպում է Միջոցառման պայմանները բավարարող մեքենասարքավորում ձեռքբերելու վարկ/լիզինգ։
• Էկոնոմիկայի նախարարության կողմից բանկի ներկայացման հայտի ստուգումից հետո իրականացվում է տոկոսադրույքի սուբսիդավորում։

Անհրաժեշտ փաստաթղթեր

Անհրաժեշտ փաստաթղթերի ցանկը տրամադրում է ֆինանսական կառույցը։

ՀՀ Կառավարության՝ 26 մարտի 2020 թվականի N 355-Լ որոշում

Էլ․ հասցե՝ modernization@mineconomy.am,

ՀՀ ԷՆ ձեռներեցության վարչություն (հեռ. (+37411) 597-118)։

 ԹԵԺ ԳԻԾ` 81-40