ՀՀ էկոնոմիկայի նախարարի տեղակալ Տաթևիկ Սարգսյանը մարտի 21-ին ընդունել է անասնաբուժական ոլորտի մի շարք փորձագետների։ Պատվիրակությունը Հայաստան է ժամանել Կենդանիների առողջության համաշխարհային կազմակերպության (WOAH/ԿԱՀԿ) կողմից հաստատված PVS Gap Analysis Update առաքելության շրջանակներում։

Քննարկվել են անասնաբուժության և սննդամթերքի անվտանգության ոլորտների առաջնահերթությունները։ Այս համատեքստում հյուրերին տեղեկացվել է, որ ՀՀ կառավարության կողմից հաստատվել և ներկայումս իրականացման փուլում է գտնվում ՀՀ սննդամթերքի անվտանգության համակարգի զարգացման ռազմավարությունը։

Անասնաբուժության, հանրային առողջության, կենդանիների առողջության, լաբորատորիաների, անասնաբուժական ծառայությունների կառավարման և այլ համապատասխան ոլորտներում փորձագետների կողմից բացերի վերլուծությունը արժեքավոր գործընթաց է հանդիսանում, հետագայում ոլորտի քաղաքականության մշակման համար, անասնաբուժական ծառայությունների շարունակական բարելավման և կարողությունների ԿԱՀԿ-ի միջազգային չափանիշներին համապատասխանեցնելու, ինչպես նաև նոր շուկաներ դիվերսիֆիկացնելու և արտահանմանը խթանելու տեսանկյունից։

Անդրադարձ է կատարվել նաև տնտեսություններում և արտադրություններում Սննդամթերքի անվտանգության ոլորտում Վտանգի վերլուծության հսկման կրիտիկական կետերի (HACCP) համակարգի սկզբունքների վրա հիմնված համակարգերի ներդրման ապահովմանը։