Թեթև արդյունաբերությունը Հայաստանի Հանրապետության մշակող արդյունաբերության կարևոր ուղղություններից մեկն է և էական դեր ունի տնտեսական զարգացման, արտադրական կարողությունների ընդլայնման, զբաղվածության ապահովման և արտահանման ներուժի աճի տեսանկյունից։

Ոլորտը ներառում է մի շարք արտադրական ենթաճյուղեր, մասնավորապես՝ տեքստիլի, հագուստի, կոշիկի և կաշվի արտադրությունը, ինչպես նաև կահույքի, թղթի և տպագրական արտադրանքի, խաղալիքների և այլ հարակից արտադրությունները։

Թեթև արդյունաբերության ոլորտում պետական քաղաքականության մշակումը և իրականացումը համակարգվում է Հայաստանի Հանրապետության էկոնոմիկայի նախարարության կողմից՝ ուղղված ոլորտի մրցունակության բարձրացմանը, արտադրական կարողությունների զարգացմանը, տեղական արտադրության ընդլայնմանը, ինչպես նաև միջազգային շուկաներում հայկական արտադրանքի առաջխաղացմանը։

Տեքստիլ ոլորտի զարգացման նպատակով ՀՀ կառավարության 2023 թվականի փետրվարի 2-ի 138-Լ որոշմամբ հաստատվել է «Տեքստիլ արդյունաբերության զարգացման ծրագիրը և դրանից բխող 2023-2026 թվականների գործողությունների ծրագիրը», որի իրականացումը միտված է ոլորտի մրցունակության բարձրացմանը, արտադրական կարողությունների զարգացմանը, ավելացված արժեքի ստեղծմանը և արտահանման հնարավորությունների ընդլայնմանը։

 Թեթև արդյունաբերության ոլորտում պետական քաղաքականության արդյունավետ իրականացման, ոլորտային ծրագրերի համակարգման և զարգացման նախաձեռնությունների իրականացման նպատակով ՀՀ կառավարության 2025 թվականի հուլիսի 24-ի 1023-Ա որոշմամբ   ստեղծվել է «Տեքստիլ ոլորտի օպերատոր» հիմնադրամը։ Հիմնադրամը ՀՀ էկոնոմիկայի նախարարության հետ համագործակցությամբ իրականացնում է ոլորտի զարգացմանն ուղղված ծրագրեր և նախաձեռնություններ՝ միտված արտադրական կարողությունների զարգացմանը, արժեքային շղթաների ընդլայնմանը, ինչպես նաև հայկական արտադրանքի և հայկական բրենդների ճանաչելիության բարձրացմանն ու միջազգային շուկաներում դրանց առաջխաղացմանը։

Էկոնոմիկայի նախարարության կողմից մշակվում և իրականացվում են պետական աջակցության մի շարք ծրագրեր և միջոցառումներ, որոնք ուղղված են Թեթև արդյունաբերության զարգացմանը, մասնավորապես՝

• Արտադրողականության խթանման նպատակային ծրագիր
• Գերակա ոլորտում իրականացվող ներդրումային ծրագրի շրջանակներում ներմուծվող տեխնոլոգիական սարքավորումների, դրանց բաղկացուցիչ ու համալրող մասերի, հումքի և (կամ) նյութերի նկատմամբ սակագնային, մասնավորապես, ներմուծման մաքսատուրքից ազատելու արտոնության մասին միջոցառում
• Մշակող արդյունաբերության ոլորտում աշխատողների ներգրավման միջոցառում
• Տեքստիլ ոլորտի կազմակերպությունների համար մատակարարման շղթաների դիվերսիֆիկացիայի ապահովմանն ուղղված պետական աջակցության  միջոցառում
• Արտահանման խթանման նպատակով օժանդակության տրամադրման ծրագիր
• Արտադրանքի սերտիֆիկացման և լաբորատոր փորձարկումների վճարների փոխհատուցման ծրագիր
• Կառավարման համակարգերի և արտադրանքի համապատասխանության սերտիֆիկատների ստացման աջակցության ծրագիր
• Ենթակառուցվածքներ ներդրումների դիմաց միջոցառում