«ՀՀ կառավարությունը կորպորատիվ կառավարման սկզբունքների կիրառումը դիտարկում է որպես մասնավոր հատվածի կայուն զարգացման կարևոր գործոն, իսկ կազմակերպությունների կառավարման մարմինների հաշվետվողականությունը և դրանց որոշումների թափանցիկությունը` որպես մասնավոր հատվածում ռիսկերը կրճատելու և օտարերկրյա ներդրումների հոսքը խթանելու միջոց:

Հայաստանի Հանրապետության առաջին կորպորատիվ կառավարման կանոնագիրքը հավանության է արժանացել 2010 թվականի դեկտեմբերի 30-ին ՀՀ կառավարության թիվ 1769-Ա որոշմամբ: Նոր կորպորատիվ կառավարման կանոնագիրքը հաստատվել է ՀՀ Էկոնոմիկայի նախարարի 30․07․2024թ․ թիվ 1955-Ն հրամանով ։

Կանոնագրքին միացող կազմակերպությունը պարտավոր է յուրաքանչյուր հաշվետու տարվա համար պատրաստել և մինչև հաշվետու տարվան հաջորդող տարվա հունիսի 30-ը իր համացանցային կայքէջում հրապարակել Կանոնագրքով նախատեսված տարեկան հաշվետվությունն, ինչպես նաև դրա մաս կազմող կորպորատիվ կառավարման զեկույցը և կորպորատիվ կառավարման տարեկան հայտարարագիրը` «Հետևի՛ր կամ բացատրի՛ր» սկզբունքի հիման վրա։

Ակնկալվում է, որ միջազգային լավագույն պրակտիկային համապատասխանող Կորպորատիվ կառավարման սկզբունքների կիրառությունը հայաստանյան ընկերությունների կողմից կնպաստի ներդրողների վստահությանը, ռիսկերի նվազեցմանը, ռեսուրսների արդյունավետ բաշխմանը, երկարաժամկետ աճին, գործարար ոլորտում բարեվարքության ամրապնդմանը և շահակիցների  շահերի պաշտպանությանը»։