ՀՀ Էկոնոմիկայի նախարարի տեղակալ Տիգրան Գաբրիելյանը և Հայաստանի Հանրապետության Ագրոարդյունաբերական համակարգի աշխատողների արհեստակցական կազմակերպությունների ճյուղային հանրապետական միության նախագահ Հասմիկ  Ջհանգիրյանը ապրիլի 21-ին, Էկոնոմիկայի նախարարությունում ստորագրել են փոխգործակցության հուշագիր, որի հիմնական նպատակն է համատեղ գործունեության արդյունքում նպաստել գյուղատնտեսության զարգմացմանը։

Համագործակցության շրջանակում նախատեսվում է կազմակերպել միջոցառումներ, սեմինարներ, վերապատրաստումներ, ժողովներ՝ ուղղված ոլորտի աշխատողների շահերի ներկայացմանը և պաշտպանությանը, համագործակցել համապատասխան միջազգային կազմակերպությունների, արհեստակցական այլ միությունների և հիմնադրամների հետ։

Մինչ հուշագրի ստորագրումը, քննարկվել են մի շարք հարցեր գյուղատնտեսության վարման մշակույթի, գյուղատնտեսական մթերքների արտադրության զարգացման և շուկաների ձևավորման, ոլորտի աշխատողների   աշխատանքային և սոցիալ-տնտեսական իրավունքների և շահերի պաշտպանության վերաբերյալ։

Նախարարի տեղակալ Տիգրան Գաբրելյանը հույս է հայտնել, որ հուշագրով նախատեսված համագործակցությունը կնպաստի մի շարք խնդիրների լուծմանը, այդ թվում նաև՝ զբաղվածության:

Միջոցառման ավարտին Ագրոարդյունաբերական համակարգի աշխատողների արհեստակցական կազմակերպությունների ճյուղային հանրապետական միության նախագահ Հասմիկ Ջհանգիրյանը շնորհակալություն է հայտնել էկոնոմիկայի փոխնախարար Տիգրան Գաբրիելյանին ընդունելության համար, լիահույս լինելով, որ հանդիպման ընթացքում հնչեցրած առաջարկություններն ու նախանշված ծրագրերը կդառնան  իրականություն: