Փետրվարի 17-ին Երևանում տեղի է ունեցել ARMENIA-HI TECH EVENT  միջոցառումը, որի շրջանակում կայացել է բարձր տեխնոլոգիաներին և ստարտափերին նվիրված իրանական ցուցահանդեսը։

Միջոցառմանը մասնակցել են Հայաստանի և Իրանի գերատեսչությունների պաշտոնյաներ, Հայաստանում ԻԻՀ դեսպանը, Հայաստանի և Իրանի պետական և մասնավոր հատվածի, հասարակական կազմակերպությունների ներկայացուցիչներ։

ՀՀ էկոնոմիկայի նախարարի տեղակալ Ավագ Ավանեսյանը, ողջունելով միջոցառման մասնակիցներին՝  կարևորել է նման նախաձեռնությունները և նշել․ «Մենք պետք է գտնենք այն տեղերը, որտեղ Իրանի ժողովուրդը և Հայաստանի ժողովուրդը կարող  է համագործակցել, ստեղծել ավելացված արժեք և նպաստել համատեղ առաջընթացի, իսկ դա հնարավոր չէ առանց անմիջական կապերի հաստատման։ Էկոնոմիկայի նախարարությունը համարում է, որ պետք է զգալիորեն ակտիվացնել իրանական պատվիրակությունների այցերը Հայաստան և հայկական պատվիրակությունների այցերը Իրան, որպեսզի մենք ավելի լավ ծանոթանանք միմյանց, գտնենք այն կետերը, որտեղ հայաստանյան և իրանական ընկերությունները կարող են համագործակցել»։  

Ավագ Ավանեսյանը շրջել է ցուցահանդեսային տաղավարներով, ծանոթացել իրանական արտադրանքին,  զրուցել մասնակիցների հետ։ 

Ցուցահանդեսում ներկայացված են Իրանի Իսլամական Հանրապետության  արդյունաբերության տարբեր ոլորտները, մասնավորապես՝ էներգետիկան, նանոտեխնոլոգիաների ադդյունաբերությունը, բժշկական սարքավորումները, տեղեկատվական և հեռահաղորդակցության տեխնոլոգիաները, դեղագործությունը, շինարարական ադյունաբերությունը և այլն։

Ցուցահանդեսը կազմակերպվել է Իրանի արտահանման և ներդրումների կենտրոնի կողմից՝ ԻԻՀ նախագահի աշխատակազմի նորարարության և բարգավաճման հիմնադրամի պատվիրակության Հայաստան կատարած այցի շրջանակում։ Պատվիրակության կազմում են նաև 60 պետական և մասնավոր ընկերությունների ներկայացուցիչներ՝ Հայաստանի պետական և մասնավոր հատվածների ներկայացուցիչների հետ առևտրատնտեսական ոլորտին վերաբերող հանդիպումներ ունենալու նպատակով։