Փետրվարի 5-ին ՀՀ էկոնոմիկայի նախարարությունում, նախարար Գևորգ Պապոյանի մասնակցությամբ, տեղի է ունեցել պայմանագրի ստորագրման արարողություն։ «Ասկե Գրուպ» ԲԲԸ-ն «Թողարկման և վարկանիշավորման պետական աջակցության ծրագրի» շրջանակներում ստանալու է աջակցություն։ Ընկերությունը թողարկել, տեղաբաշխել և ցուցակել է 15 մլրդ դրամ և 15 մլն դոլար ծավալով պարտատոմսեր։

Պայմանագիրը ստորագրել են ՀՀ էկոնոմիկայի նախարարության գլխավոր քարտուղար Հայկազ Նասիբյանը և «Ասկե Գրուպ» ԲԲԸ-ի տնօրեն Հրաչյա Մուրադյանը։

Ընկերությունն աջակցությունը ստանալու է դրամային պարտատոմսերի թողարկման համար՝ 1-ին փուլով 30 մլն ՀՀ դրամի չափով։ Հետագա 3 տարիների ընթացքում Ծրագրի պահանջները բավարարելու դեպքում ընկերությունը կարող է ստանալ ևս 135 մլն դրամի աջակցություն։

Կառավարության 06.07.2023թ. թիվ 1125-Լ որոշմամբ հաստատված «Թողարկման և վարկանիշավորման պետական աջակցության ծրագիրը» խթանում է կապիտալի շուկայի զարգացումը, աջակցում է իրական հատվածի ընկերությունների կողմից պարտատոմսերի, բաժնետոմսերի թողարկմանը, միջազգային վարկանիշի ձեռքբերմանը։ Պարտատոմսերի թողարկման և ցուցակման դեպքում աջակցությունը տրվում է պարտատոմսերի ծավալի 11 տոկոսի չափով՝ ըստ փուլերի։ «Ասկե Գրուպ» ԲԲԸ-ն ծրագրի 3-րդ շահառուն է։