Էկոնոմիկայի նախարար Գևորգ Պապոյանը օգոստոսի 2-ին այցելել է շինանյութերի ներմուծմամբ, արտադրությամբ և վաճառքով զբաղվող «ԻՄԷՔՍ գրուպ» ՍՊԸ։ Այցին մասնակցել է նաև նախարարի տեղակալ Նարեկ Տերյանը։

Ընկերության ղեկավարության ուղեկցությամբ նախարարը նախ շրջել է Maverick արտադրամասում, որտեղ ավանդական փայտե լամինատի փոխարեն արտադրվում են ջրակայուն, էկոլոգիապես մաքուր spc (stone plastic composite) Maverick հատակներ։ Արտադրանքն այս պահին իրացվում է Հայաստանում, սակայն արդեն ունեն պատվերներ արտերկրից։

Այնուհետև նախարարը եղել է ընկերության ներկերի արտադրության Tintakol գործարանում, որտեղ իտալական տեխնոլոգիայով արտրադրվում են էկոլոգիապես մաքուր, եվրոպական ստանդարտներին համապատասխան ներկեր ներսի և դրսի աշխատանքների համար։

Գևորգ Պապոյանը շրջել է արտադրամասերով և ծանոթացել լամինատի և ներկերի արտադրական գործընթացին, ներդրված ժամանակակից սարքավորումներին։

Շրջայցի ընթացքում նախարարը ներկայացրել է պետական օժանդակության գործիքակազմը։