ՀՀ էկոնոմիկայի նախարար Գևորգ Պապոյանը սեպտեմբերի 19-ին այցելել է Արարատի մարզում գործող «Վեդի-Ալկո» ՍՊԸ՝ հետևելու խաղողի մթերումների ընթացքին։
Այցին մասնակցել են նաև Արարատի մարզպետ Սեդրակ Թևոնյանը, Արտաշատ համայնքի ղեկավար Կառլեն Մկրտչյանը, Վեդի համայնքի ղեկավար Գարիկ Սարգսյանը և նախարարի տեղակալ Արման Խոջոյանը։

Ընկերության տնօրենի ուղեկցությամբ նախարարը շրջել է ընկերությունում, ծանոթացել արտադրական գործընթացներին։ Ընկերությունն արդեն իսկ մթերել է շուրջ 5000 տոննա խաղող, օրական մթերումների քանակը հասնում է 600 տոննայի։ Մթերման գինն ընկերությունում կազմում է 140 դրամ։

Նախարարը զրուցել է խաղողագործների հետ։ Վերջիններս նշել են, որ բերքից գոհ են, իրենց գնահատմամբ, նախորդ տարվա համեմատ այն 20-30%-ով ավելացել է, իսկ մթերումներն ընթանում են սահուն՝ առանց խոչընդոտների։

«Վեդի-Ալկո»-ն օգտվել է ՀՀ էկոնոմիկայի նախարարության կողմից իրականացվող ագրոպարենային ոլորտի սարքավորումների լիզինգի և մթերումների աջակցության ծրագրերից, որոնց շնորհիվ կարողացել է արդիականացնել արտադրական գործընթացը։

Ընկերությունն ունի մոտ 100 հա խաղողի այգիներ Վայոց ձորի մարզում և շուրջ 50 հա Արարատի մարզում։

Ընկերությունում արտադրվում են տարատեսակ օղիներ, մրգահատապտղային թունդ ըմպելիքներ, կոնյակներ, անապակ, կիսաանապակ, կիսաքաղցր, կիսաաղանդերային, աղանդերային բարձրորակ գինիներ, որոնք մեծ պահանջարկ են վայելում սպառողների շրջանում:

Արտադրանքն արտահանվում է Ռուսաստանի Դաշնություն, Ղազախստան, Բելառուս, ԱՄՆ, Ֆրանսիա, Չինաստան, Ուկրաինա, մերձբալթյան և այլ երկրներ։