ՀՀ էկոնոմիկայի նախարարի տեղակալ Տաթևիկ Սարգսյանն օգոստոսի 28-ին Ախուրյանի Կառնուտ բնակավայրում այցելել է «Գաբոյանի Մուշեղ» ՍՊԸ։ Այցին մասնակցել է նաև Շիրակի մարզպետ Մուշեղ Մուրադյանը։

Ընկերության ղեկավար Հովհաննես Գաբոյանի ուղեկցությամբ Տաթևիկ Սարգսյանը շրջել է ֆերմերային տնտեսությունում, ծանոթացել գործունեությանն ու նախատեսվող ծրագրերին։

Ֆերմերն օգտվել է պետական աջակցության մի շարք ծրագրերից, մասնավորապես՝ «ՀՀ-ում 2019 - 2024 թվականների տավարաբուծության զարգացման» ծրագրի շրջանակներում ձեռք է բերել 28 գլուխ խոշոր եղջերավոր կենդանի, որից՝ 8 գլուխ անգուս, 20 գլուխ սիմենթալ, իսկ «ՀՀ-ում ոչխարաբուծության և այծաբուծության զարգացման աջակցության» ծրագրով՝ 200 գլուխ ֆրանսիական բլանշ ցեղի ոչխարներ։

Բացի այդ, ֆերման ժամանակակից տեխնիկայով և սարքավորումներով վերազինելու նպատակով ընկերությունը «Հայաստանի Հանրապետությունում ագրոպարենային ոլորտի սարքավորումների լիզինգի աջակցության» ծրագրի շրջանակներում ձեռք է բերել կերաղաց-կերաբաշխիչ սարքավորում, իսկ «Գյուղատնտեսական տեխնիկայի լիզինգի աջակցության» ծրագրով՝ տրակտոր։

Շրջայցի ընթացքում Տաթևիկ Սարգսյանը եղել է նաև տնտեսության ցորենի պահեստներում, ծանոթացել զտման և ախտահանման գործընթացին։