Հոկտեմբերի 14-ին Էկոնոմիկայի նախարարությունում  կայացել է «Իտալիայի ԼՈԳՈ ցուցահանդեսի»  շնորհանդեսը` որը նվիրված էր Իտալիայի ժամանակակից արվեստի օրվան։ Միջոցառումը կազմակերպվել էր Հայաստանում Իտալիայի դեսպանատան և «Իտալական ապրանքանիշի թանգարանի»  հետ համատեղ։

Ողջունելով ներկաներին՝ նախարար Վահան Քերոբյանը բարձր է գնահատել Իտալիայի հետ հարաբերությունները և տարբեր ոլորտներում փորձի փոխանակման անհրաժեշտությունը․ «Մենք, իհարկե, կցանկանայինք փորձի փոխանակում իրականացնել, քանի որ հասկանում ենք, թե ինչպես ճիշտ մարքեթինգը, բրենդինգը, ապրանքանիշերը կարող են ազդել թե՛ ապրանքի գնագոյացման վրա, թե՛ ընդհանրապես բարձրացնել արտադրողականությունը և զարգացնել տնտեսությունը։ Մենք ցանկանում ենք, որ բացառապես  ցանկացած ապրանք, որը թողարկվում է Made in Armenia պիտակի ներքո, արտացոլի մեր ազգային  հայեցակարգը, որը ներառում է որակ, բացառիկություն  և համապատասխանում է բարձր չափանիշների», - իր ողջույնի խոսքում  նշել է նախարար Վահան Քերոբյանը։

Իտալական ապրանքանիշի թանգարանը ներկայացնում է իտալական կարևորագույն ապրանքանիշերի էվոլյուցիայի և ոճափոխության վերաբերյալ հարուստ վիզուալ գրականություն, ինչը ճշգրիտ պատմական, գրաֆիկական հետազոտության արդյունք է, այն Made in Italy ապրանքանիշի վիզուալ մանրամասն հաշվետվություն է։

Հոկտեմբերի 17-ից մինչև 30-ը ժ․10:00-17։00-ը բոլոր քաղաքացիները կարող են այցելել Էկոնոմիկայի նախարարություն՝  ցուցահանդեսը դիտելու։ Մուտքն ազատ է։