Հունվարի 21-ին ՀՀ էկոնոմիկայի նախարարի տեղակալ Ռաֆայել Գևորգյանը կազմակերպել էր հանդիպում՝ նվիրված Հայաստանի տեքստիլ արդյունաբերության աջակցման ծրագրի քննարկմանը, որին մասնակցում էին տեքստիլի ոլորտի զարգացման փորձագետ Տիգրան Ջրբաշյանը, Գործարարության աջակցման գրասենյակի ղեկավար Հովսեփ Պատվականյանը, ոլորտում գործող մի շարք կազմակերպությունների և նախարարության համապատասխան ստորաբաժանումների ներկայացուցիչներ։ 

Ծրագիրն իրականացվում է Միացյալ Թագավորության կառավարության «Լավ կառավարման հիմնադրամի» ֆինանսավորմամբ, ՎԶԵԲ աջակցությամբ և Գործարարության աջակցման գրասենյակի համակարգմամբ:

Ողջունելով հանդիպման մասնակիցներին՝ Ռաֆայել Գևորգյանը նշել է, որ ծրագրի նպատակն է մշակել առաջարկություններ Հայաստանում արտադրվող տեքստիլ արտադրանքի հավելյալ արժեքը բարձրացնելու և ավելի մրցունակ դարձնելու ուղիների վերաբերյալ՝ հաշվի առնելով առկա խնդիրները և տվյալ ապրանքային կատեգորիայի համար GSP+ ռեժիմի դադարեցման հանգամանքը։

Փոխնախարարի խոսքով՝ ծրագրի մշակման արդյունքում նախագծվելու է ճանապարհային քարտեզ՝ մանրամասն գործողությունների ծրագիր, գնահատման արդյունքների և առաջարկությունների հիման վրա մշակվելու է ռազմավարության պլան։  

Այնուհետև փորձագետ Տիգրան Ջրբաշյանը գործարարներին համառոտ ներկայացրել է Հայաստանում տեքստիլ արդյունաբերության զարգացման հիմնական միտումները, այս ոլորտում իրականացված փորձագիտական վերլուծություններն ու ծրագրի աշխատանքային փուլերը։

Հանդիպման ընթացքում մասնակիցները ներկայացրել են իրենց խնդիրները, քննարկել դրանց լուծման հնարավոր եղանակները։

Հետագա քայլերի շուրջ քննարկումներն ավելի առարկայական շարունակելու համար կկազմակերպվեն ծրագրի պատասխանատուների այցեր ոլորտում գործող մի շարք ընկերություններ: