ՀՀ կառավարության 2025 թվականի հունվարի 23-ի N 98-Ն որոշմամբ հաստատվել է «Արտահանման խթանման նպատակով օժանդակության տրամադրման ծրագիրը», որի շրջանակում Հայաստանի Հանրապետության ռեզիդենտ կազմակերպություններին և ՀՀ-ում հաշվառված անհատ ձեռնարկատերերին տրամադրվում է պետական աջակցություն՝ Հայաստանի Հանրապետության ծագում ունեցող ապրանքների արտահանման դեպքում։

Ծրագրի համաձայն՝ տնտեսավարողներին տրամադրվում է օժանդակություն Եվրոպական միության անդամ պետություններ, Մեծ Բրիտանիայի և Հյուսիսային Իռլանդիայի Միացյալ Թագավորություն և Կանադա արտահանման դեպքում՝ ներմուծման երկրում տվյալ ապրանքի համար սահմանված մաքսատուրքի դրույքաչափով հաշվարկված գումարին համարժեք չափով։

Պարտադիր պահանջներ

Ծրագրից օգտվելու համար պետք է ապահովվեն հետևյալ պայմանները՝

• արտահանումը պետք է իրականացվի Եվրոպական միության անդամ պետություն, Մեծ Բրիտանիա կամ Կանադա,
• արտահանվող ապրանքը պետք է հանդիսանա մշակող արդյունաբերության արտադրանք (ՏԳՏԴ C բաժին) և ունենա Հայաստանի Հանրապետության ծագում,
• արտահանումը պետք է իրականացված լինի «Արտահանում» կամ «Վերաարտահանում» մաքսային ընթացակարգով,
• արտահանող տնտեսավարողը հայտի ներկայացման պահին չպետք է ունենա մեկ միլիոն դրամ և ավելի հարկային պարտավորությունների գանձման որոշում կամ ժամկետանց հարկային պարտավորություններ։

Դիմելու կարգը

Օժանդակություն ստանալու համար տնտեսավարողը Հայաստանի Հանրապետության էկոնոմիկայի նախարարություն պետք է ներկայացնի համապատասխան հայտ՝ արտահանման գործընթացի ավարտից հետո վեց ամսվա ընթացքում։

Հայտին կցվում են՝

• արտահանման մաքսային հայտարարագրի պատճենը և արտահանման գործընթացը հաստատող այլ փաստաթղթեր,
• արտահանվող ապրանքի Հայաստանի Հանրապետության ծագումը հավաստող փաստաթուղթը,
• կազմակերպության պետական գրանցման վերաբերյալ փաստաթուղթը,
• բանկային հաշվեհամարը,
• սահմանված ձևով հայտարարությունը և անհրաժեշտ այլ տեղեկություններ։

Փաստաթղթերի համապատասխանության դեպքում շահառուի հետ կնքվում է համապատասխան պայմանագիր։

Օժանդակության չափը

Օժանդակության գումարը հաշվարկվում է արտահանվող ապրանքի մաքսային արժեքի և ներմուծման երկրում կիրառվող մաքսատուրքի դրույքաչափի հիման վրա։

Եթե ներմուծման երկրում տվյալ ապրանքի համար սահմանված մաքսատուրքի դրույքաչափը գերազանցում է 20 տոկոսը, ապա հաշվարկի համար կիրառվում է առավելագույնը 20 տոկոս դրույքաչափ։

Փոխհատուցման չափը որոշվում է արտահանման և ներմուծման հայտարարագրերում նշված մաքսային արժեքների հիման վրա, և տարբերության դեպքում կիրառվում է դրանցից նվազագույն արժեքը։

Ծրագիրը գործում է մինչև 2026 թվականի դեկտեմբերի 31-ը ներառյալ կատարված արտահանումների համար:

Ծրագրի վերաբերյալ առավել մանրամասն տեղեկատվությանը կարող եք ծանոթանալ հետևյալ հղումով:

Լրացուցիչ տեղեկատվության համար կարող եք զանգահարել՝ +374 11 597 146 հեռախոսահամարով։