Կարտոֆիլ, ցորեն, գարի, վարսակ ցանողների համար գյուղատնտեսական ապահովագրության ժամկետները երկարաձգվել են։ Անբարենպաստ եղանակի պատճառով հատկապես հյուսիսային մարզերում գյուղացիները չեն հասցնում ցանքս կատարել, ինչի համար էլ ապահովագրության ժամկետների երկարաձգման խնդրանքով դիմել են մարզպետարաններ։ Էկոնոմիկայի նախարարությունը գյուղացիների առաջարկը չի մերժել։

Իռա Փանոսյան (ՀՀ էկոնոմիկայի նախարարության ծրագրերի մշակման վարչության պետ) - Ցորեն, գարի և վարսակ մշակաբույսերի ապահովագրության վերջնաժամկետը կարկուտ և հրդեհ ռիսկից մայիսի 1-ի փոխարեն երկարաձգվել է մինչև մայիսի 20-ը։ Իսկ կարտոֆիլի պայմանագրերի կնքման ժամկետը երկարաձգվել է մինչև մայիսի 15-ը։

Արդեն երկրորդ տարին որոշ մշակաբույսեր փորձնական ապահովագրում են՝ պետական աջակցության 50-60 տոկոս սուբսիդավորման տարբերակով։ Փորձնական ապահովագրությունը կշարունակվի մինչև 2023 թվականը, այնուհետև արդյունքներն ամփոփելուց հետո կանցնեն հիմնական ապահովագրությանը։ Առաջին տարում կնքվել էր 1546 պայմանագիր՝ 2500 հեկտարի համար։ Այս տարվա մարտի տվյալով արդեն կնքվել է 2500 պայմանագիր, ապահովագրվել է 4000 հեկտար։

Իռա Փանոսյան - Երբ որ գյուղացին տեսնում է, որ նորմալ վնասի գնահատում է տեղի ունենում, արդեն իսկ վստահաբար իր հարևանին էլ է խորհուրդ տալիս, որ գնա ու դիմի։

Փորձնական ապահովագրման ընթացքում գործընթացը սկսեցին երկու մշակաբույսով, հիմա արդեն ապահովագրում է 11-ը։ Փորձնական ծրագրի տարիների արդյունքի վերլուծությունից հետո չի բացառվում, որ գյուղացու ծախսի փոխհատուցման մեխանիզմից անցում կատարվի բերքի ապահովագրության։