Արցախյան պատերազմի հետևանքով Հայաստան է տեղափոխվել մինչև 55000 կով, 90000 մանր եղջերավոր կենդանի: էկոնոմիկայի նախարարության անասնաբույժներն անմիջապես սկսեցին կենդանիների այս տարվա պատվաստումները:
ՀՀ էկոնոմիկայի նախարարի տեղակալ Տիգրան Գաբրիելյանն իր խոսքում նշում է «Պատերազմական իրավիճակը նաև համընկնում էր Արցախի Հանրապետությունում պատվաստման ժամանակահատվածի հետ․ մենք իրականացրեցինք պատվաստում այն հիվանդությունների նկատմամբ, որը նախատեսված էր մեր հակահամաճարակային պլանով։ Չի բացառվում, որ բերված որոշ կենդանիներ դուրս են մնացել անասնաբույժների տեսադաշտից: Այդ պատճառով պետականորեն սահմանված անվճար պատվաստումներն այս տարի սահմանվածից շուտ կսկսեն։ Ե՛վ պատվաստանյութն է տրամադրում պետությունը, և՛ պատվաստման գումարը»։
ՄԱԿ-ի պարենի և գյուղատնտեսության կազմակերպությունն էլ իր հերթին Արցախից տեղահանված, նաև Սյունիքում արոտավայրեր կորցրած անասնապահներին մոտ 350 հազար դոլարի աջակցություն կցուցաբերի: Անասնապահներին կհատկացվեն անասնակեր, սարքավորումներ և տեղափոխված գյուղատնտեսական կենդանիների համար ժամանակավոր կացարաններ կառուցելու շինանյութ: