ՀՀ էկոնոմիկայի նախարարի տեղակալ Արման Խոջոյանը ապրիլի 8-ին մասնակցել է «Leasing EXPO/ Բոլոր սարքավորումները մեկ հարթակում» ցուցահանդեսին նվիրված մամուլի ասուլիսին։
Ասուլիսի նպատակն էր ամփոփել նախորդ տարի անցկացված «Leasing EXPO 2024. Բոլոր սարքավորումները մեկ հարթակում» խոշոր ցուցահանդեսի արդյունքները և նախորդ տարում ոլորտում եղած փոփոխությունները, ցուցահանդեսի ունեցած ազդեցությունը ոլորտի և տնտեսության վրա, ինչպես նաև ներկայացնել առաջիկայում նախատեսվող «Leasing EXPO 2025. Բոլոր սարքավորումները մեկ հարթակում» ցուցահանդեսը, մասնակից ընկերությունների հատուկ առաջարկներն և նորությունները:
Արման Խոջոյանն իր խոսքում ներկայացրել է պետության սուբսիդավորմամբ իրականացվող լիզինգային երեք ծրագրերը, որոնք ընդգրկում են տնտեսության տարբեր ճյուղեր։
«Այս երեք ծրագրերը միասին ընդհանուր առմամբ ապահովել են շուրջ 430 մլրդ դրամի պորտֆել։ Դա նշանակում է, որ 430 մլրդ դրամի նորագույն տեխնոլոգիաներ, սարքավորումներ ձեռք են բերվել և կիրառվել են տնտեսության մեջ։ Ձեռք է բերվել ընդհանուր թվով 20186 միավոր սարք-սարքավորումներ»,- նշել է նախարարի տեղակալը։