Ապրիլի 26-ին ՀՀ էկոնոմիկայի նախարարությունում կայացած Թվինինգ ծրագրի տեսանելիության ապահովման՝ «Ստեղծել պայմաններ Հավատարմագրման եվրոպական համագործակցության կողմից Հայաստանի հավատարմագրման համակարգի ճանաչման համար» միջոցառմանը մասնակցել են «Հավատարմագրման ազգային մարմին» ՊՈԱԿ-ի,  Հայաստանում ԵՄ պատվիրակության ներկայացուցիչները, ՀՀ էկոնոմիկայի նախարարության որակի ենթակառուցվածքի վարչության, համապատասխանության գնահատման հավատարմագրված մարմինների և այլ գերատեսչությունների ներկայացուցիչներ։

Միջոցառմանը մասնակցել և ողջույնի խոսքով հանդես են եկել ՀՀ էկոնոմիկայի նախարարի տեղակալ Անի Իսպիրյանը և ԵՄ պատվիրակության համագործակցության ղեկավար Ֆրենկ Հեսը։

Նախարարի տեղակալ Անի Իսպիրյանը, ողջունելով միջոցառման մասնակիցներին, նշել է, որ չափազանց կարևորում է «Հավատարմագրման ազգային մարմին» ՊՈԱԿ-ի կարողությունների և ինստիտուցիոնալ հզորացմանն ուղղված Թվինինգ ծրագիրը, որը հնարավորություն կընձեռի միջազգային փորձագետներին ուսումնասիրել հավատարմագրման ազգային մարմնի  կարողությունները, արձանագրել միջազգային ստանդարտների պահանջներին  անհամապատասխանությունները և տրամադրել համապատասխան աջակցություն հավատարմագրման ազգային մարմնի կարողությունների զարգացման ու ամրապնդման համար։ Նա նաև հավելել է, որ ծրագիրը կօգնի ձեռք բերել Հավատարմագրման եվրոպական համագործակցության եկկողմ համաձայնագրերի պայմանագրերի ստորագրող կողմի կարգավիճակ։

Իրականացվող միջոցառումները կնպաստեն առևտում տեխնիկական խոչընդոտների վերացմանը, ծառայությունների բարձր որակի ապահովման շնորհիվ համապատասխանության գնահատման գործունեության արդյունքների նկատմամբ սպառողների վստահության բարձրացմանը։

Ֆրենկ Հեսն իր խոսքում նշել է, որ Եվրամիությունն աջակցում է Հայաստանի որակի ենթակառուցվածքի բարելավմանը, որի մի մասն է կազմում հավատարմագրումը, և հույս հայտնել, որ ծրագրի իրականացման արդյունքում «Հավատարմագրման ազգային մարմին» ՊՈԱԿ-ը կդառնա Հավատարմագրման եվրոպական կազմակերպության անդամ, ինչի արդյունքում Հայաստանը կկարողանա բարելավել համապատասխանության գնահատման մարմինների կողմից մատուցվող ծառայությունների որակը։

Միջոցառման ընթացքում ԵՄ անդամ պետության կողմից ծրագրի ղեկավար, Գերմանիայի հավատարմագրման մարմնի (DAkkS) միջազգային հարաբերությունների մասով  ավագ խորհրդատու Թոմաս Ֆաքլամը, «Հավատարմագրման ազգային մարմին» ՊՈԱԿ-ի տնօրեն Անի Օբոսյանը  և «Թվինինգ» ռեզիդենտ խորհրդատու Միկլոշ Դևեչը հանդես են եկել շնորհանդեսներով։ Ներկայացվել են ծրագրի շրջանակում իրականացված միջոցառումներն ու աշխատանքները, ինչպես նաև դրանց արդյունքում կատարված բարեփոխումները, տեղեկատվություն է ներկայացվել առաջիկա գործողությունների վերաբերյալ։

Ամփոփելով քննարկումը՝ մասնակիցները մեկ անգամ ևս վերահաստատել են համատեղ ջանքերով ծրագրի նպատակներն իրականացնելու իրենց հանձնառությունը։