Հայ-ավստրիական առևտրատնտեսական և գիտատեխնիկական համագործակցության միջկառավարական հանձնաժողովի նիստի շրջանակներում Երևանում փետրվարի 3-ին կազմակերպվել է B2G և B2B ձևաչափով հայ–ավստրիական գործարար համաժողով, որին մասնակցել են երկու երկրների գործարար համայնքի ավելի քան 100-ից ավելի ներկայացուցիչներ:

Համաժողովին իր ողջույնի խոսքում ՀՀ էկոնոմիկայի նախարարի տեղակալ Ռաֆայել Գևորգյանը նշել է, որ հայ-ավստրիական գործարար համաժողովը հնարավորություն կընձեռի հանգամանալից ծանոթանալ երկու երկրների ներդրումային հնարավորություններին և կնպստի տարբեր ոլորտների ներկայացուցիչների հետ գործարար կապերի հաստատմանը։

Գործարար համաժողովին ելույթ են ունեցել նաև ՀՀ արտաքին գործերի նախարար Արարատ Միրզոյանը և Ավստրիայի Հանրապետության արտաքին գործերի դաշնային նախարար Ալեքսանդր Շալլենբերգը։

«Այս համաժողովն իսկապես հրաշալի առիթ է հայ-ավստրիական տնտեսական հարաբերություններում առկա մակարդակը ֆիքսելու, այն ավելի խորացնելու, փոխշահավետ նոր գործարար կապեր հաստատելու և, ընդհանուր առմամբ, մեր երկրների միջև տնտեսական հարաբերությունները նոր որակի բերելու համար։ Մենք հնարավորություն ունենք ուղենշել տնտեսական ոլորտում փոխգործակցության խորացմանն ուղղված մեր քայլերը և այս տեղանկյունից մեծապես ողջունելի է տարբեր ոլորտներ ներկայացնող ավստրիական ընկերությունների մասնակցությունն այս համաժողովին», - ողջունելով գործարար համաժողովի մասնակիցներին՝ նշել է Արարատ Միրզոյանը։

Նախարարն ընդգծել է, որ Հայաստանում ձեռնարկվում են բոլոր անհրաժեշտ քայլերը, որպեսզի ապահովվեն անհրաժեշտ բարենպաստ միջավայրը, որտեղ տնտեսական հարաբերություններն ու բիզնես կապերը կարող են իրենց հարմարավետ զգալ։

Ավստրիայի Հանրապետության արտաքին գործերի դաշնային նախարար Ալեքսանդր Շալլենբերգը իր ելույթում կարևորել է հայ-ավստրիական նման խոշոր գործարար համաժողովի կազմակերպումը։ «Մենք, քաղաքական գործիչներս, կարող ենք միայն դռներ բացել, միայն օրակարգեր ձևավորել, կարող ենք հետաքրքրվածություն առաջացնել, սակայն ի վերջո բիզնեսները, ընկերությունները պետք է առաջնագծում լինեն և զարգացնեն այս հարաբերությունները և կարծում եմ այս միջոցառումը նրանց համար շատ ոգևորիչ հնարավորություն է»։

Համաժողովի ընթացքում ավստրիացի գործարարներին «Ներդրումների աջակցման կենտրոն» հիմնադրամի ներդրումների գծով տնօրեն Արամ Վարդանյանը ներկայացրել է Հայաստանի ներդրումային միջավայրի վերաբերյալ շնորհանդես:

Գործարար համաժողովի շրջանակում հայկական և ավստրիական կողմերի միջև ստորագրվել է երկու հուշագիր։

Առաջին` փոխըմբռնման հուշագիրը, ստորագրվել է "Myler Mountain Resort" և "Doppelmayr Seilbahnen" ընկերությունների միջև, որով "Doppelmayr Seilbahnen" ընկերությունը 2022 թվականի ընթացքում կմատակարարի ճոպանուղու կաբելային խցիկներ Արագածոտնի մարզի Եղիպատրուշ համայնքում լեռնադահուկային համալիրի կառուցման նախագծի շրջանակում:

«Սա կարևոր ներդրումային ծրագիր է մեզ համար և մենք ուրախ ենք, որ այս հուշագրի ստորագրմամբ արդեն անցում ենք կատարում նախագծի իրագործման գործնական քայլերին. լիահույս եմ, որ մենք շուտով կունենանք նոր լեռնադահուկային համալիր Հայաստանում», – նշել է ՀՀ էկոնոմիկայի նախարարի տեղակալ Նարեկ Տերյանը:

Երկրորդ՝ համագործակցության մասին հուշագրով, «International Power Corporation» և «Voith Hydro» ընկերությունները նախատեսում են համագործակցել Սևան-Հրազդան կասկադի վերականգնման ուղղությամբ։ Հուշագրի պայմաններն ու մանրամասները կողմերը նախատեսում են քննարկել ավելի ուշ։