«Արմենպրես»-ի մամուլի սրահում կայացել է ՀՀ էկոնոմիկայի նախարարի տեղակալներ Արման Խոջոյանի և Տիգրան Գաբրիելյանի մամուլի ասուլիսը՝ նվիրված գյուղատնտեսության ոլորտում ծրագրային բարեփոխումներին։

 

Նախարարի տեղակալ Արման Խոջոյանը ասուլիսի ընթացքոմ անդրադարձել է հետևյալ թեմաներին․

• Գյուղոլորտին տրամադրված աջակցություն

Համաձայն ԿԲ-ի տրամադրած տեղեկատվության՝  կորոնավիրուսի տնտեսական հետևանքների չեզոքացման 2-րդ միջոցառման շրջանակում տրամադրվել է 16200 վարկ, 23 մլրդ դրամ ծավալով:

2020 թվականի սկբից մինչ այսօր գյուղատնտեսական ոլորտի պետական օժանդակության շրջանակում տրամադրվել է 18000 վարկ, 37 մլրդ դրամ ծավալով: Այս ցուցանիշը գրեթե 3 անգամ գերացանցում է նախորդ տարվա նույն ժամանակահատվածի համար տրամադրված վարկերին:

Գյուղմթերքի արտահանում և մթերում:

Արտահանման գործընթացն ընթանում է բավականին սահուն, գյուղմթերքը ժամանակին հասնում է արտաքին շուկաներ: Այս պահի դրությամբ Հայաստանից արտահանվել է 13000 տոննա ծիրան, շուրջ 3200 տ. կեռաս, 21000 տ. լոլիկ, խնձոր 5500 տ., 800 տ. ելակ, ընդհանուր առմամբ 58000 տ. պտուղբանջարեղեն:  

Ակտիվ են նաև մթերման գործընթացները.  այս պահի դրությամբ մթերվել է մոտ 5500 տոննա պտուղբանջարեղեն, որից 1200 տոննան բանջարեղենն է:

• Ցորենի արտադրություն

Հայաստանում 2019 թվականի համար աշնանացան ցորենի ցանքատարածքները կազմում են 56000 հետար, իսկ գարնանացանի համար՝ 3000 հեկտար: Աշնանացան ցորենի բերքահավաքն արդեն սկսվել է:

Կառավարությունը հավանության է արժանացրել աշնանացան ցորենի արտադրության խթանման պետական աջակցության ծրագիրը, որի հիմնական նպատակն է աշնանացան ցորենի սերմերի գնի մասնակի փոխհատուցման միջոցով նպաստել ագրոտնտեսական բարձր ցուցանիշներով օժտված սերմերի հասանելության ապահովմանը, բերքատվության բարձրացմանը, ցանքաշրջանառության խթանմանը, ցանքատարածքների ավելացմանը:  

Ծրագիրը կիրականացվի Շիրակի, Սյունիքի, Գեղարքունիքի, Լոռու, Արագածոտնի, Տավուշի և Կոտայքի մարզերում, քանի որ նշված մարզերում ցորենի ցանքատարածությունները կազմում են Հայաստանի Հանրապետության ընդհանուր ցորենի ցանքատարածությունների 90%-ից ավելին:

Ծրագրի շահառուներ կարող են հանդիսանալ նշված մարզերում՝ 2-20 հա մակերեսով ցորենի ցանքատարածություններ մշակող տնտեսավարողները, ընդ որում ծրագրի շրջանակում յուրաքանչյուր շահառուի կողմից ձեռք բերվող սերմերի հանրագումարը չի կարող գերազանցել 7000 կգ-ը (1 հա-ի հաշվով առավելագույնը 350 կգ-ը):

Ծրագրում ներկայացված են սերմերի սորտերի ցանկ, որոնք արդեն գրանցված են սերմերի գործակալությունում: Ծրագրի շրջանակում կարող են կիրառվել միայն այն սերմերը, որոնք արդեն  փորձարկվել, հավաստագրվել և գրանցվել են համապատասխան կառույցի միջոցով:

• Գյուղտեխնիկայի լիզինգ

Որոշակի փոփոխություններ են տեղի ունեցել գյուղտեխնիկայի լիզինգի ծրագրում. 20 տոկոս կանխավճարը փոխարինվել է 10 տոկոսով,  մյուս 10 տոկոսի երաշխավոր հանդիսանում է կառավարությունը:

 

Նախարարի տեղակալ Տիգրան Գաբրիելյանը ներկայացրել է հետևյալ ծրագրերը․

• Սպանդանոցների հիմնում

Այժմ լիզինգի ծրագրով կարող են ֆինանասավորվել շարժական և մոդուլային սպանդանոցները: Նախանշված վայրերում մոդուլային կամ շարժական սպանդանոցներ հիմնելու համար կառավարությունը 4,8 միլիոն դրամ դրամաշնորհ կհատկացնի, որը կկազմի լիզինգով ձեռք բերվող գրավի 20 տոկոսի 15 տոկոսը:

Ըստ ՍԱՏՄ-ի տրամադրած տեղեկատվության այժմ ՀՀ-ում սպանդանոցային գործունեության ռեեստրում գրանցված են 53 խոշոր սպանդանոցներ, որոնցից 26-ն են ծառայություն մատուցում, իսկ 27-ը սեփական արտադրության համար են: Այս փուլում  նախարարությանը հետքրքրում են այն սպանդանոցները, որոնք ծառայություն են պատուցում:

• ԽԵ կենդանիների հաշվառման և համարակալման ծրագիր

ԽԵ կենդանիների համարակալման ծրագիրը հունիս ամսին կառավարության կողմից ևս հավանության է արժանացել:

Մինչ բուն համարակալման գործընթացը կոնկրետ կազմակերպությունների կողմից կկազմակերպվեն իրազեկման արշավներ:  ԽԵ կենդանիների համարակալման, տվյալների թվայնացման աշխատանքների գործընթացը իրականացվելու  է «Գյուղատնտեսական ծառայությունների կենտրոն» ՊՈԱԿ-ի կողմից, իսկ վերահոսկողությունը՝ ՍԱՏՄ-ի: Այս տարի նախատեսվում է համարակալել  800,000 ԽԵ, ինչի համար ձեռք է բերվելու 1,600,000 ականջապիտակ:

Ծրագիրը կնպաստի ԽԵԿ համարակալման և հաշվառման ինստիտուի կայացմանը, նախիրներում ըստ սեռահասակային կազմի ԽԵԿ-ի գլխաքանակի վերաբերյալ ստույգ տեղեկատվական բազայի առկայությանը, հանրապետության ողջ տարածքով ԽԵԿ-ի տեղաշարժի վերահսկմանը և հետագծելիության բարելավմանը: