Արարատի մարզում նոյեմբերի 15-ին կազմակերպվել է ‹‹Նորագույն տեխնոլոգիաներով ջերմատնային հիմնում և արդյունավետ կառավարում՝ հողախառնուրդի և հիդրոպոնիկայի կիրառմամբ›› թեմայով վերապատրաստման դասընթաց ՀՀ էկոնոմիկայի նախարարության գյուղատնտեսական խորհրդատվության, նորարարությունների և մոնիթորինգի վարչության Արարատի և Արմավիրի բաժինների խորհրդատուների համար, որը վարել է ՀՀ էկոնոմիկայի նախարարի խորհրդական Սյուզաննա Հովսեփյանը:

Դասընթացի ընթացքում մանրամասն ներկայացվել են ջերմատների տեսակները, նախագծա-նախահաշվարկային և շինարարական-կառուցապատման աշխատանքները, հիդրոպոնիկայի կիրառությունը ջերմատնային տնտեսությունում, քննարկվել են տեղանքի ընտրության և ծածկի հարցերը:

Դասընթացի գործնական հատվածն անցկացվել է Արարատի մարզում գործող սածիլներ և լոլիկ աճեցնող ջերմատներից մեկում։

Դասընթացի հիմնական նպատակն էր խորացնել խորհրդատուների գիտելիքներն ու հմտությունները ջերմոցային մշակաբույսերի մշակման առանձնահատկությունների, ջերմոցային տնտեսություններիում կիրառվող նորարարական մոտեցումների վերաբերյալ, որպեսզի վերջիններս, վերապատրաստումից հետո, փոխանցեն իրենց գիտելիքները ֆերմերային տնտեսությունների ներկայացուցիչներին:

Վերապատրաստման դասընթացները կկրեն շարունակական բնույթ: Հետագայում նախատեսվում է կազմակերպել նմանատիպ դասընթացներ գյուղատնտեսության nոլորտի այլ ճյուղերի, այդ թվում` ագրոնոմիայի և անասնաբուծության վերաբերյալ: