ՀՀ Էկոնոմիկայի նախարար Վահան Քերոբյանը նոյեմբերի 28-ին ընդունել է Հայաստանում ԱՄՆ գործերի ժամանակավոր հավատարմատար Չիփ Լեյթինենին և ԱՄՆ դեսպանության քաղաքական և տնտեսական բաժնի պետ Էլիսոն Հաննային։ Հանդիպմանը մասնակցել է նաև նախարարի տեղակալ Արմեն Արզումանյանը։

Հանդիպման ընթացքում քննարկվել է ԱՄՆ-ի կողմից Հայաստանի Հանրապետությանը շուկայական տնտեսության կարգավիճակի տրամադրման նպատակով համապատասխան գործընթացի իրականացման հարցը։  Նախարարը կարևորել է կարգավիճակի տրամադրումը Հայաստանին և փաստել, որ շուկայական կարգավիճակի ստացումը խթան կհանդիսանա  ԱՄՆ-ից և այլ երկրներից Հայաստան ներդրումների ծավալների մեծացմանը և օտարերկրյա ներդրողների առավել մեծ վստահության ամրապնդմանը, ինպես նաև իր էական ազդեցությունը կունենա հետագա հնարավոր  հակագնագցման ուսումնասիրությունների գործընթացների վրա։ 

Պայմանավորվածություն է ձեռք բերվել տրամադրելու ԱՄՆ-ի կողմից շուկայական տնտեսության կարգավիճակ ստանալու վերաբերյալ հայկական կողմից պատրաստված զեկույցը և իրականացնելու հատագա բանակցային գործընթացները։

Նախարարն անդրադարձել է Հայաստանի տնտեսության ոլորտում իրականացվող քաղաքականությանը, որում առանցքային դեր է կատարում արտադրողականության բարձրացումը։ Այս համատեքստում նախարարը կարևոր է համարել տնտեսության արդիականացման միջոցառումը, որի շրջանակում պետությունն աջակցում է տնտեսավարողներին սարքավորումների արդիականացման և բարձրակարգ մասնագետների ներգրավման հարցում։

Վահան Քերոբյանը հանդիպման ընթացքում ներկայացրել է նաև տնտեսության ոլորտի Հայաստանի ներդրումային գրավչության բարձրացման և նոր ներդրումների ներգրացման ուղղությամբ ձեռնարկվող քայլերը, նախատեսվող նոր ծրագրերն ու նախաձեռնությունները։