Նախարար Վահան Քերոբյանը հունիսի 30-ին ընդունել է «Մոսմետրոստրոյ» («Мосметрострой») ընկերության գլխավոր տնօրեն Սերգեյ Ժուկովի գլխավորած պատվիրակությանը։ Հանդիպմանը ներկա էին նաև նախարարի տեղակալներ Արմեն Արզումանյանն ու Նարեկ Տերյանը: 

Ընկերության ներկայացուցիչները նպատակ ունեն ծանոթանալ Հայաստանի տրանսպորտային ենթակառուցվածքներին, հասկանալու այդ ոլորտում հետագա համագործակցության հեռանկարները։

Նախարարը ողջունել է հյուրերին և տեղեկացրել, որ Երևանում նախատվում է կառուցել ճարտարագիտական նորագույն լուծումներով մետրոյի նոր կայարան, ինչպես նաև բարելավել մետրոպոլիտենի գործող կայարանները և Երևան-Թբիլիսի-Երևան գնացքի աշխատանքը։

Սերգեյ Ժուկովը ներկայացրել է իրենց ընկերության գործունեությունը՝ նշելով, որ իրենք զբաղվում են ոչ միայն մետրոյի, այլև թունելների, ճանապարհային հանգույցների կառուցման և ճանապարհաշինարարական այլ աշխատանքներով ևս։

Նախարարը ընկերության ներկայացուցիչներին ներկայացրել է նաև Հյուսիս–հարավ» ավտոճանապարհի Սիսիան–Քաջարան հատվածի շինարարական աշխատանքների  մի քանի մանրամասներ և հավելել, որ այդ հատվածում նախատեսվում է կառուցել  5 թունելներ, որոնցից ամենաերկարը 8 կմ է լինելու, ինչպես նաև  միջազգային չափանիշներին բավարարող բարելավումներ իրականացնել։

Ընկերության տնօրենը հույս է հայտնել, որ Հայաստանի հետ կիրականացվեն հետաքրքիր նախագծեր, նաև կլինի մասնագիտական փորձի փոխանակում: