Էկոնոմիկայի նախարարի տեղակալ Ռաֆայել Գևորգյանը հանդիպում է ունեցել Հայ իրավաբանների ասոցիացիայի Մտավոր սեփականության/Տեղեկատվական տեխնոլոգիաների իրավունքի կոմիտեի անդամների հետ:

Հանդիպմանը մասնակցել են Մտավոր սեփականության գրասենյակի ղեկավար Քրիստինե Համբարյանը, գրասենյակի ղեկավարի տեղակալ Շուշիկ Մխիթարյանը, նախարարության  փորձագետ-խորհրդական Սարգիս Կնյազյանը և մտավոր սեփականության ոլորտի ներկայացուցիչներ:

Հայ իրավաբանների ասոցիացիայի Մտավոր սեփականության/Տեղեկատվական տեխնոլոգիաների իրավունքի կոմիտեի կողմից մտավոր սեփականության ոլորտում իրականացվող ծրագրի շրջանակում ներգրավված են Հայ իրավաբանների ասոցիացիայի պրոֆեսիոնալ կամավոր իրավաբաններ, համապատասխան ոլորտի աշխատակիցներ և ՀՀ կառավարության ներկայացուցիչներ:

Հանդիպման ընթացքում քննարկվել են ոլորտի ներկայիս իրավական և գործնական խնդիրները։ Կողմերը քննարկել են մտավոր սեփականության իրավունքների կիրարկման և մտավոր սեփականության իրազեկման բարձրացման, ինչպես նաև Մտավոր սեփականության գրասենյակի կարողությունների հզորացման վերաբերյալ հարցեր: Պայմանավորվածություն է ձեռք բերվել մտավոր սեփականության իրավունքների պաշտպանության բնագավառում հետագա ծրագրերի խորացման վերաբերյալ: