ՌԴ Տյումենի մարզ կատարած այցի շրջանակում ՀՀ Էկոնոմիկայի նախարարի տեղակալ Նարեկ Տերյանի գլխավորած պատվիրակությունը հանդիպում է ունեցել Տյումենի մարզի նահանգապետ Ալեքսանդր Մոորի հետ։

Հանդիպման ընթացքում Նարեկ Տերյանը նշել է․ «Համագործակցության զարգացման կարևորագույն ուղղություններից է արդյունաբերական կոոպերացիան։ Մեր երկրների գործարարները պետք է փոխգործակցության ընդհանուր եզրեր գտնեն։ Կարծում եմ, Հայաստանի Հանրապետության և Տյումենի մարզի կառավարությունները կստեղծեն դրա համար առավել բարենպաստ պայմաններ»։

Նախարարի տեղակալը նաև բարձր է գնահատել Տյումենի մարզի զբոսաշրջային ներուժը և փոխադարձ զբոսաշրջային հոսքերի ավելացման հնարավորությունները։

Իր հերթին Ալեքսանդր Մոորը նշել է, որ Տյումենի մարզի կառավարությունը պատրաստ է օգտագործել բոլոր հնարավորությունները տարածաշրջանի և Հայաստանի Հանրապետության միջև փոխշահավետ համագործակցության հետագա զարգացման համար։

«Տյումենի մարզը և Հայաստանի Հանրապետությունը երկարաժամկետ հուսալի գործընկերներ են։ Մեզ մոտ բնակվում է ավելի քան յոթ ու կես հազար հայ։ Տարածաշրջանում ակտիվորեն գործում են «Տյումենի մարզի հայերի միություն» հասարակական կազմակերպությունը և հայկական մշակույթի կենտրոնը», - նշել է նահանգապետը։

Տնտեսության ոլորտում համագործակցության զարգացման ռազմավարական ուղղությունների թվում Տյումենի նահանգապետը մատնանշել է նավթագազային մեքենաշինությունը և սպասարկումը, նավթաքիմիան, փայտամշակումը, գյուղատնտեսությունը և զբոսաշրջությունը։

Հանդիպման ընթացքում կողմերը ցանկություն են հայտնել ընդլայնել գործակցությունը նաև հումանիտար ոլորտում։