ՀՀ էկոնոմիկայի նախարար Վահան Քերոբյանը մայիսի 14-ին մասնակցել է Ֆաբ Լաբ Հայաստան-Դիլիջանի բացման արարողությանը։

Միջոցառմանը ողջույնի խոսքով հանդես է եկել  Ֆաբ Լաբ Հայաստան–Դիլիջանի  գործադիր տնօրենի ժամանակավոր պաշտոնակատար Ժաքլին Կարաասլանյանը։

Ֆաբ Լաբ Connect-ի գործադիր տնօրեն և համահիմնադիր, Ֆաբ Լաբ դպրոցի համահիմնադիր Սիմոն Ամբերը, Ֆաբ Լաբ դպրոցի գործադիր տնօրեն և համահիմնադիր, Ֆաբ Լաբ Connect-ի համահիմնադիր Նադեր Շատերյանը համառոտ ներկայացրել են իրենց տեսլականը Հայաստանում Ֆաբ Լաբի կայացման և հեռանակարների մասին։

Միջոցառումը հիանալի հնարավորություն էր բացահայտելու թվային արտադրությունը և Ֆաբ ակադեմիայի ծրագիրը, որը Մասաչուսեթսի տեխնոլոգիական ինստիտուտն (MIT) ընձեռում է Ֆաբ Լաբ Հայաստան–Դիլիջանին՝ դասընթացների և նախատիպերի ստեղծման միջոցով՝ MIT պրոֆեսոր Նիլ Գերշենֆելդի առաջնորդությամբ:  

Դիլիջանի կենտրոնական դպրոցում բացված Ֆաբ Լաբի համահիմնադիրները, ուսուցիչները և աշակերտները  խոսել են իրենց նպատակների մասին, ներկայացրել  իրենց գործունեությունը և աշխատանքները, որոնք պատկերացում են տալիս ապագայի մասին։ Այնուհետև տեղի է ունեցել աշակերտների աշխատանքների ցուցադրություն և ոչ ֆորմալ հաղորդակցություն միջոցառման մասնակիցների միջև։ 

Ֆաբ Լաբում կրթում են՝ ողջունելով կրեատիվ մտածելակերպը, խթանելով նախաձեռնողականությունը, տալով  տեխնոլոգիական գիտելիքներ և զարգացնելով ստեղծարար միտքը՝ կյանքի տարբեր բնագավառների համար գտնելու յուրահատուկ լուծումներ։

Այստեղ պատկերացում են տալիս ֆիզիկական և թվային աշխարհների միաձուլման մասին։ Այստեղ սովորում են ապագան կերտելու համար։

Ֆաբ Լաբ Հայաստան-Դիլիջանի կայացմանը և բացման արարողության կազմակերպմանն աջակցել է ՀՀ Կենտրոնական բանկը։

Ֆաբ Լաբը «խելացի» լաբորատորիա է՝ զինված նորարարական տեխնոլոգիաներով։ Այն հնարավորություն է տալիս աշակերտներին և ուսանողներին կատարել տարբեր հետազոտություններ, փորձարկել նոր գաղափարներ։ Այստեղ կատարվող աշխատանքները կապված են ոչ միայն տեխնոլոգիական նորարարությունների, այլև նոր բիզնես մոտեցումների, ռոբոտաշինության, դիզայնի, ճարտարապետության, գյուղատնետեսական և առողջապահության սարքավորումների ուսումնասիրման հետ։

Ֆաբ Լաբերը ստեղծվել են  Մասաչուսեթսի տեխնոլոգիական ինստիտուտի կողմից և ներկայումս ակտիվորեն տարածվում են ամբողջ աշխարհով մեկ։

2021 թվականի տվյալներով, աշխարհում գործում է երկու հազարից ավել Ֆաբ Լաբ։

https://fablabarmenia.com/