Էկոնոմիկայի նախարար  Վահան Քերոբյանն ապրիլի 7-ին հանդիպում է ունեցել Հայաստանի արդյունաբերողների և գործարարների միության նախագահ Արսեն Ղազարյանի և փոխնախագահ Ներսես Կարամանուկյանի հետ։

Հանդիպման ընթացքում քննարկվել են ներկա իրավիճակով պայմանավորված գործարարների առաջ ծառացած խնդիրները՝ կապված ներմուծման և արտահանման հետ։

Անդրադարձ է եղել Հայաստանում  գործող արդյունաբերական պարկերին և բարձրորակ ենթակառուցվածքներով  նոր պարկ ստեղծելու հնարավորություններին։

Նախարարը ներկայացրել է հողային բարեփոխումների ծրագրի նախագիծը, որը մեծ հետաքրքրություն է առաջացրել ներկաների մոտ։ Առաջարկվել է նախագիծը տրամադրել միությանը՝ այն գործարարների շրջանում քննարկելու և հնարավոր առաջարկներ ներկայացնելու համար։ 

Հանդիպման ընթացքում արծարծվել են նաև դեպի Հայաստան և Հայաստանից դուրս իրականացվող բեռնափոխադրումներին առնչվող հարցերը և քննարկվել դրանք ավելի արդյունավետ կազմակերպելու տարբերակները։

Վահան Քերոբյանը հյուրերին ներկայացրել է Տնտեսության արդիականացման միջոցառումը, որը միտված է տնտեսավարողների համար ստեղծել մատչելի ֆինանսական միջոցների հասանելիություն՝ արտադրական հնարավորություններն արդիականացնելու և նոր տեխնոլոգիաների ներմուծումը Հայաստան խթանելու նպատակով։  

Արսեն Ղազարյանն իր հերթին տեղեկացրել է, որ միության անդամներից շատերն արդեն իսկ օգտվում են ընձեռված հնարավորությունից և ընդգծել միջոցառման կարևորությունը՝ հատկապես այսօրվա իրականության մեջ հայակական ընկերությունների մրցունակության և աշխատանքի արդյունավետության բարձրացման տեսանկյունից։

Հանդիպման ավարտին կողմերը պայմանավորվել են էլ ավելի ամրապնդել պետության և գործարար միությունների միջև համագործակցությունը։