էկոնոմիկայի նախարարի տեղակալ Ռաֆայել Գևորգյանը, Նորամուծության և ձեռներեցության ազգային կենտրոնի կողմից նախաձեռնած գիտական կենտրոններ ճանաչողական այցերի շրջանակում, ապրիլի 1-ին այցելել է ԳԱԱ Լ. Ա. Օրբելու անվան Ֆիզիոլոգիայի ինստիտուտ։

Այցի նպատակն էր տեղում ծանոթանալ ինստիտուտի գործունեությանը, գիտական ներուժին, իրականացվող հետազոտություններին, տեխնիկական հագեցվածությանը  և առկա խնդիրներին։

ԳԱԱ Լ.Ա.Օրբելու անվան Ֆիզիոլոգիայի ինստիտուտի տնօրեն Նաիրա Այվազյանը  ներկայացրել է ինստիտուտի գործունեությունը, ապա ինստիտուտի տարածքով շրջայցի ընթացքում ծանոթացրել լաբորատորիաներում իրականացվող հետազոտություններին, ցուցադրել սարքավորումները։

Ռաֆայել Գևորգյանը զրուցել է ինստիտուտի գիտնականների և աշխատակիցների հետ, ծանոթացել նրանց գործունեությանը։  Նախարարի տեղակալը ներկայացրել է պետական աջակցության գործիքներն ու մեխանիզմները, որոնք կարող են նպաստել գիտություն-տնտեսություն կապի ակտիվացմանը և գիտական արտադրանքի առևտրայնացմանը։

ՀՀ ԳԱԱ Լ.Ա.Օրբելու անվան ֆիզիոլոգիայի ինստիտուտի հիմնական գիտական ուղղությունը նյարդաֆիզիոլոգիան է` նյարդային համակարգի ինտեգրատիվ պլաստիկական հատկությունների, շարժողական և վեգետատիվ ֆունկցիաների կենտրոնական կազմակերպման մեխանիզմների ուսումնասիրությունը, ստացված արդյունքների հիման վրա գործնական առաջադրանքների մշակումը:

Ներկայումս ինստիտուտի կողմից աշխատանքներ են իրականացվում օձերի թույների հակաթույների ստացման, հյուսվածքային ինժեներիայի զարգացման, բնական/արհեստական մաշկի ստացման, ցավազրկող դեղանյութերի ստեղծման,  նոր սերնդի վիբրոակուստիկ տվիչների՝ բժշկագիտության մեջ օգտագործման ուղղությամբ։   

Ինստիտուտում հետազոտություններ են կատարվում՝ նվիրված ուղեղի և ուղեղաբնի շարժողական կառույցների ֆունկցիոնալ կազմակերպման ու պլաստիկության մեխանիզմների բացահայտմանը, օրգանիզմի վեգետատիվ ֆունկցիաների կարգավորման մեխանիզմներում ուղեղի խորանիստ կառույցների դերի ուսումնասիրությանը, կենտրոնական նյարդային համակարգի ձևաբանաֆունկցիոնալ կազմակերպման ու վերականգնման պլաստիկության մեխանիզմների պարզաբանմանը, սուր ու քրոնիկ ոչ յուրահատուկ նյարդա-դեգեներացիայի և կենսակարգավորիչներով ազդելու պայմաններում, նյարդային և անոթային գոյացությունների բջջային կառույցների ձևաբանա-ֆունկցիոնալ առանձնահատկությունների հյուսվածքա-քիմիական ուսումնասիրությանը, մաթեմատիկական մոդելների կիրառմամբ նյարդային համակարգի սինապսային պլաստիկության հարցերի հետազոտմանը, նյարդային համակարգի վրա կենդանական թույների ազդեցության նյարդա-քիմիական մեխանիզմների ուսումանսիրության և ստանդարտիզացման հարցերին և մի շարք այլ ուղղություններով։