ՀՀ էկոնոմիկայի նախարարի տեղակալ Անի Իսպիրյանը մարտի 9-ին այցելել է «EVAN» ընկերություն, որը մասնագիտացած է էլեկտրական մեքենաների լիցքավորման տեխնոլոգիաների մշակման և լիցքավորման կայանների արտադրության մեջ։

Ընկերության հիմնադիր Հռիփսիմե Գևորգյանն և տնօրեն Հակոբ Գևորգյանը համառոտ ներկայացրել են կազմակերպության գործունեությունը, ընթացիկ աշխատանքներն ու նախատեսվող ծրագրերը։ Նրանք տեղեկացրել են, որ ընկերության կայաններն արդեն գործարկել են Հայաստանում, բաղադրիչ մասերի և օժանդակ սարքավորումները մասամբ ներկրվում են այլ երկրներից, այդ թվում՝ ԱՄՆ-ից և Չինաստանիցի, մասամբ էլ արտադրվում են տեղում, իսկ կայանների արտադրական ողջ գործընթացը կազմակերպվում է տեղում։     

Հակոբ Գևորգյանը նշել է, որ ընկերությունում արտադրվում են տարբեր տեսակի լիցքավորման կայաններ։ Նրա խոսքով՝ ընկերության նպատակն է կազմակերպել այնպիսի արտադրություն, որում բոլոր բաղադրիչները հնարավոր կլինի արտադրել տեղում՝ տեղացի մասնագետների ինժեներական լուծումներով, հայկական ծրագրային ապահովմամբ, ստեղծել լիցքավորման ցանցեր։ Ընկերությունը նախատեսում է նաև ընդլայնել արտադրության ծավալներն՝ պատրաստի արտադրանքը դեպի այլ երկրներ արտահանելու հեռանկարով։

Մշակվել է նաև համապատասխան բջջային հավելված, որի միջոցով հնարավոր կլինի կատարել վճարումներ, տեղեկանալ լիցքավորման մոտակա կետերի մասին, ինչպես նաև մեքենան լիցքավորելու համար ամրագրել տեղ։

Հանդիպման ընթացքում Անի Իսպիրյանը ընկերության ներկայացուցիչների հետ քննարկել է արտադրության կազմակերպմանն առնչվող խնդիրները, անդրադարձել խոչընդոտներին, ինչպես նաև գերակա ոլորտում իրականացվող ներդրումային ծրագրերի շրջանակում մաքսատուրքից ազատման արտոնության տրամադրման հնարավորություններին։

Ընդգծելով, որ էլեկտրական շարժիչով մեքենաների արտադրությունը Հայաստանում կարևոր և շատ հեռանկարային ճյուղ է՝ Անի Իսպիրյանն իր կողմից պատրաստակամություն է հայտնել հնարավորինս աջակցել ընկերությանը իրենց արտադրությունն ընդարձակելու և գործունեությունն ավելի արդյունավետ կազմակերպելու հարցում։