Հայաստանի տեքստիլ արդյունաբերության աջակցության ծրագրի շրջանակներում Էկոնոմիկայի նախարարի տեղակալ Ռաֆայել Գևորգյանն այցելել է տեքստիլ մի քանի  ընկերություններ։

Այս անգամ այցելություններ են կատարվել ոչ միայն խոշոր, այլև փոքր ընկերություններ։

Նախարարի տեղակալը եղել է «Ալեքս Տեքստիլ», «Քանաքեռի կարի գործարան», «Սոնատի» և «Հելոտեքս» ընկերություններում։

«Ալեքս Տեքստիլ» ընկերության տնօրեն Մարատ Մովսիսյանը Ռաֆայել Գևորգյանին ներկայացրել է գերհզոր և ժամանակակից սարքավորումներով արտադրամասերի գործարկման ուղղությամբ վերջին տարիներին իրականացված աշխատանքները, արտահանման ծավալներն ու ընկերության զարգացման ծրագրերը։

«Քանաքեռի կարի գործարան» ընկերությունը մասնագիտացել է արտահագուստի, ինչպես նաև բանակի համար համազգեստի արտադրության մեջ: Ներկայումս ընկերությունը համազգեստ  է արտադրում հայկական Զինված ուժերի համար։

«Սոնատի» ընկերությունն արտադրում է  բարձրակարգ անկողնային պարագաներ։ Ընկերությունը ուրույն տեղ է վաստակել տեղական շուկայում և ծրագրում է արտահանման գործընթաց սկսել դեպի ԱՄՆ։

Տեքստիլ ընկերություններ այցերի ընթացքում նկատվել է, որ սեփական ապրանքանիշը ստեղծելու և զարգացնելու դրական միտում է նկատվում հատկապես փոքր ընկերությունների  շրջանում։ 

«Հելոտեքս» ընկերությունը նույնպես մեծ աշխատանքներ է իրականացրել իր ապրանքանիշը զարգացնելու գործում․  ընկերության արդեն հայտնի «Artsocks»  ապրանքանիշն արտահանվում է եվրապական մի շարք երկրներ։

Այցերի ընթացքում հավաքագրված խնդիրների շարքում դարձյալ առաջնային է մնում ոլորտի նեղ մասնագետների՝ կարի օպերատորիների, տեխնոլոգների, նախագծողների և սարքավորումների ինժեներների հարցը։

Շուրջ մեկ ամսվա ընթացքում տեքստիլ ընկերություններ կատարած այցերի արդյունքում հավաքագրված բոլոր խնդիրները նախատեսվում է  ներառել Կառավարության 2021-2026 թթ․ ռազմավարության մեջ, որտեղից էլ կբխեն ոլորտի աջակցության տարաբնույթ գործիքները։