Կորոնավիրուսային վարակի տարածման հետ կապված իրավիճակի և դրանով պայմանավորված՝ Ռուսաստանի Դաշնության կողմից կիրառվող բժշկական պաշտպանիչ առանձին տեսակի ապրանքների արտահանման ժամանակավոր սահմանափակումների հետևանքով, առաջացել Է բժշկական նշանակության անհատական պաշտպանության միջոցների խիստ անհրաժեշտություն:

Խնդրի լուծման նպատակով հայկական կողմը մշակել և Եվրասիական տնտեսական հանձնաժողով (ԵԱՏՀ) է ներկայացրել առաջարկություն Միության Միասնական մաքսային սակագնում փոփոխություններ կատարելու և մինչև 2020 թվականի դեկտեմբերի 31-ը առանձին տեսակի ապրանքների նկատմամբ 0% մաքսատուրքի դրույքաչափ սահմանելու վերաբերյալ: Առաջարկության  հիման վրա ԵԱՏՀ խորհրդն ընդունել է համապատասխան որոշում։ Այդ որոշման կիրարկման նպատակով ՀՀ էկոնոմիկայի նախարարությունը մշակել է «Հայաստանի Հանրապետության տարածք երրորդ երկրներից «բացթողում՝ ներքին սպառման համար» մաքսային ընթացակարգով 2019-nCoV կորոնավիրուսային վարակի տարածման նախազգուշացմանը և կանխարգելմանն ուղղված առանձին տեսակի ապրանքների նպատակային նշանակությունը հաստատող եզրակացության տրամադրման կարգը հաստատելու մասին» ՀՀ կառավարության որոշման նախագծը, որն ընդունվել է ապրիլի 4-ին:  

Նույն որոշմամբ հաստատվել են ՀՀ մաքսային տարածք ներմուծվող առանձին տեսակի ապրանքների նպատակային նշանակությունը հաստատող եզրակացության տրամադրման համար անհրաժեշտ փաստաթղթերի ձևանմուշները։ Նաև սահմանվել է, որ Հայաստանի Հանրապետության տարածք ներմուծված 2019-nCoV կորոնավիրուսային վարակի տարածման նախազգուշացմանը և կանխարգելմանն ուղղված առանձին տեսակի ապրանքների նկատմամբ արտոնության կիրառման համար նպատակային նշանակությունը հաստատող եզրակացություն տրամադրող լիազոր մարմինն է Հայաստանի Հանրապետության առողջապահության նախարարությունը:

• ՀՀ տարածք ներմուծվող առանձին տեսակի ապրանքների նպատակային նշանակությունը հաստատող եզրակացության տրամադրման կարգը