Ի պատասխան «Ժողովուրդ» օրաթերթի «Որևէ պետական կառույց չկա, որպեսզի պայքարի մկների և մորեխների դեմ. նման հողատարածքներն ավելացել են» վերնագրով հոդվածի՝ հայտնում ենք, որ ՀՀ էկոնոմիկայի նախարարության «Գյուղատնտեսական ծառայությունների կենտրոն» ՊՈԱԿ-ը, մկնանման կրծողների դեմ պայքարի նպատակով, վարելահողերում և բազմամյա տնկարկներում ամեն տարի իրականացնում է մոնիթորինգ:

Փետրվարի սկզբից մինչև մարտի 10-ը մոնիթորինգն իրականացվում է ցածրադիր գոտիներում, իսկ ապրիլի 1-ից ապրիլի 20-ը՝ լեռնային գոտիներում: Մոնիթորինգի արդյունքում համայնքների՝ կրծողներով միջին և բարձր վարակվածությամբ տարածքների մասին ինֆորմացիան ներկայացվում է ՀՀ էկոնոմիկայի նախարարություն: Դրանից հետո նախարարությունը համապատասխան հրաման է ուղղում ՊՈԱԿ-ին՝ կոնկրետ մարզի համար մկնանման կրծողների դեմ կոնկրետ չափով «Բրոմադիալոն» մկնասպան պրեպարատ տեղափոխելու համար: ՊՈԱԿ-ը հրամանը ստանալու հենց հաջորդ օրը թունաքիմիկատները հասցնում է մարզպետարաններ, որոնք էլ պետք է բաշխվեն համայնքներին: Թվային տվյալները ՊՈԱԿ-ը ևս կտրամադրի:

Իսկ ինչ վերաբերում է մորեխներին, ապա հանրապետությունում կա 45 տեսակի տեղական մորեխ, որոնք հոտեր չեն կազմում. հոտեր են կազմում միայն իտալական մորեխները: Այսպիսով՝ իտալական մորեխների դեմ պայքարի նպատակով այն տարածքներում, որտեղ օջախային կերպով հայտնաբերվում է իտալական տեսակի մորեխ, կրկին նույն սկզբունքով տրամադրվում է պաշտպանության միջոց:

Տեղեկացնում ենք նաև, որ միայն նախորդ տարի Արարատի մարզին 450-460 հա-ի համար տրամադրվել է 69 լիտր «Տրիումֆ» բույսերի պաշտպանության միջոց՝ մորեխների դեմ պայքար կազմակերպելու համար: