Նախարարի տեղակալ Ռաֆայել Գևորգյանն օգոստոսի 11-ին հանդիպել է «Մանթաշյանց» գործարարների միության անդամների հետ՝ տնտեսության ոլորտում իրականացվող նոր ծրագրերն ու նախաձեռնությունները ներկայացնելու նպատակով։

Ողջունելով հանդիպման մասնակիցներին՝ Ռաֆայել Գևորգյանը նշել է, որ Կառավարության գործողությունների ծրագրում թիրախներից մեկն աշխատանքի արտադրողականության բարձրացումն է, որն ապահովելու նպատակով դիտարկվում են երեք հիմնական ուղղություններ՝ տեխնիկական ու տեխնոլոգիական վերազինումը, բարձր որակավորում ունեցող մասնագետների ներգրավումը տնտեսության մեջ և բիզնես գործընթացների թվայնացումն ու օպտիմալացումը։

Իր խոսքում նախարարի տեղակալն անդրադարձել է նաև «Արտադրական կարողությունների արդիականացման միջոցառում» ծրագրում կատարված փոփոխություններին, համաձայն որոնց ընդլայնվել են ծրագրում ընդգրկված ոլորտները՝ ներառելով մշակող արդյունաբերություն, հանքագործական արդյունաբերություն և բացահանքերի շահագործում, տեղեկատվություն և կապ, շինարարություն, փոխադրում և պահեստային տնտեսություն, մասնագիտական, գիտական և տեխնիկական գործունեություն, կրթություն, առողջապահություն և բնակչության սոցիալական սպասարկում ոլորտները։

Ռաֆայել Գևորգյանը նշել է, որ ՀՀ կառավարությունը պատրաստ է փոխհատուցում տրամադրել այն տնտեսվարողներին, որոնք իրենց աշխատանքներում կներգրավեն բարձր որակավորում ունեցող մասնագետների։

Այս համատեքստում նախարարի տեղակալը հավելել է, որ բարձր որակավորում ունեցող մասնագետ է համարվում այն մասնագետը, ով տնտեսավարողի կողմից ծրագրին դիմելու պահին նախորդող 30 ամսից առնվազն 12-ը ապրել է Հայաստանի Հանրապետության տարածքից դուրս և բավարարում է հետևյալ պայմաններից գոնե մեկին․ ավարտել է ծրագրին դիմելու տարում հրապարակված QS համաշխարհային համալսարանների վարկանիշի առաջատար 400 բուհերից որևէ մեկը և ստացել բակալավրի, մագիստրոսի և/կամ դոկտորի որակավորում, կամ ունի նվազագույնը 10 տարվա աշխատանքային փորձ միջազգային ինդեքսներում տեղ գտած որևէ ընկերությունում:

Հանդիպման ընթացքում Ռաֆայել Գևորգյանը պատասխանել է ներկաների հարցերին, տվել պարզաբանումներ ծրագրերի վերաբերյալ: