ՀՀ Էկոնոմիկայի նախարարի տեղակալ Արման Խոջոյանը հուլիսի 6-ին մասնակցել է հայ-նիդերլանդական գործարար օրերի պաշտոնական բացման արարողությանը։ Միջոցառմանը ներկա էին նաև Հայաստանում Նիդերլանդների արտակարգ և լիազոր դեսպան Նիկոլաս Յակոբ Սխերմերսը, ՀՀ առևտրաարդյունաբերական պալատի գործադիր տնօրեն Անդրանիկ Ալեքսանյանը, պետական և մասնավոր հատվածի այլ ներկայացուցիչներ։

Շնորհակալություն հայտնելով Նիդերլանդների Թագավորության դեսպանությանը և անձամբ դեսպան Նիկոլաս Սխերմերսին վերջին տարիներին Հայաստանի և Նիդերլանդների միջև տնտեսական հարաբերությունները զարգացնելու ուղղությամբ ձեռնարկվող քայլերի համար՝ Արման Խոջոյանը համոզմունք է հայտնել, որ այս միջոցառումը կնպաստի երկու երկրների կարողությունների բացահայտմանը, երկու երկրներում առկա ներուժի ներկայացմանը, ինչպես նաև նոր հնարավորությունների և ուղենիշների նախագծմանը։ «Անհրաժեշտ է ավելի հեռանկարային մոտեցումներով պատկերացնել երկկողմ համագործակցության տեսլականը, քանի որ Հայաստանի Հանրապետությունը և Նիդերլանդների Թագավորությունը երկարաժամկետ համագործակցության նպատակ ունեն», - հավելել է Արման Խոջոյանը։

Որպես հայ-նիդերլանդական բարեհաջող համագործակցության վառ օրինակ Արման Խոջոյանը մատնանշել է Նիդերլանդների ավագ փորձագետների ընկերությունը (PUM), որը մեծ ներդրում է ունեցել Հայաստանում տարբեր ոլորտների զարգացմանը։

Դեսպան Նիկոլաս Սխերմերսն իր խոսքում նշել է, որ միջոցառման հիմնական նպատակն է աջակցել հայ և նիդերլանդական գործարար շրջանակներին ծանոթանալու միմյանց հետ և քննարկելու հնարավոր համագործակցության ընդհանուր եզրերը։

«Թեև Հայաստանի շուկան համեմատաբար փոքր է, սակայն երկկողմ համագործակցության հնարավորությունները բազմաթիվ են։ Հայաստանը մեծ ներուժ ունի հատկապես գյուղատնտեսության ոլորտում, և Նիդերլանդների հետ այս ոլորտում հնարավոր է ձևավորել արդյունավետ համագործակցություն», - նշել է դեսպանը։   

Միջոցառման ընթացքում ներկայացվել են Նիդերլանդների տնտեսական  հետաքրքրությունները Հայաստանում, այն գործիքները, որոնց միջոցով իրականացվում է նիդերլանդական կողմի աջակցությունը հայկական բիզնեսին։ Քննարկվել են Հայաստանում նիդերլանդական ընկերությունների համար առկա հնարավորությունները, ներդրումային կարողությունները հատկապես տեղեկատվական տեխնոլոգիաների, գյուղատնտեսության և կառուցապատման ոլորտներում։

Միջոցառման շրջանակում կայացել է նաև Հայաստանում Նիդերլանդա-հայկական առևտրի պալատի հանդիսավոր բացման արարողությունը և  Նիդերլանդների Թագավորության դեսպանության ու Պալատի միջև հուշագրի ստորագրումը։