ՀՀ Էկոնոմիկայի նախարարի տեղակալ Արման Խոջոյանը հունիսի 2-ին հանդիպել է Հայաստանում Պարենի և գյուղատնտեսության կազմակերպության ներկայացուցիչ Ռայմունդ Յելեի հետ՝ գյուղատնտեսության ոլորտում համատեղ իրականացվող ծրագրերը քննարկելու և հետագա համագործակցության հեռանկարները նախանշելու նպատակով։

Հանդիպման սկզբում կողմերը կարևորել և արդյունավետ են գնահատել Արման Խոջոյանի մասնակցությունը Հյուսիսային Մակեդոնիայի Հանրապետությունում օրերս կայացած ՄԱԿ ՊԳԿ-ի Եվրոպայի և Կենտրոնական Ասիայի տարածաշրջանային գրասենյակի կողմից կազմակերպված «LANDNET» 13-րդ միջազգային աշխատաժողովին։

Այնուհետև քննարկվել են Հայաստանի գյուղատնտեության ներկա վիճակին, ոլորտում առկա առավել արդիական խնդիրներին առնչվող մի շարք հարցեր։ Անդրադարձ է կատարվել գյուղատնտեսության ոլորտի հեռանկարային ճյուղերից մեկին՝ խաղողագործությանը։ Այս համատեքստում կարևորվել է ֆիլոքսերայի դեմ պայքարի և այդ վնասատուի հետագա տարածումը կանխելու համար արդյունավետ միջոցների կիրառումը:

Հանդիպման ընթացքում քննարկվել են նաև սակավաջրությամբ պայմանավորված խնդիրներից խուսափելու նպատակով ոռոգման ժամանակակից համակարգերի ներդրմանը վերաբերող հարցեր։

Զրուցակիցներն անդրադարձել են նաև Հայաստանում պարենային արտադրանքի ինքնաբավության բարձրացմանը, արտահանման և ներմուծման գործընթացների արդյունավետ կազմակերպմանը, լոգիստիկ ծառայությունների բարելավմանը, Լարսի անցակետի այլընտրանքային ճանապարհներին առնչվող խնդիրները։

Հանդիպմանը քննարկվել են երկուստեք հետաքրքրող մի շարք այլ հարցեր։