ՀՀ Էկոնոմիկայի նախարարի տեղակալներ Արմեն Արզումանյանն ու Ռաֆայել Գևորգյանը մայիսի 23-ին հանդիպում են ունեցել Էստոնիայի Հանրապետության արտակարգ և լիազոր դեսպան Ռինա Կալյուրանդիի հետ (նստավայրը՝ Թիֆլիս)՝ տնտեսության ոլորտում հայ-էստոնական հարաբերությունների ընդլայնման հնարավորությունները քննարկելու նպատակով։

Նշելով, որ սա իր առաջին այցն է ՀՀ Էկոնոմիկայի նախարարություն և շնորհակալություն հայտնելով ընդունելության համար՝ դեսպան Ռինա Կալյուրանդը  ցանկություն է հայտնել առավել հանգամանորեն տեղեկանալ Հայաստանի տնտեսության ներկա վիճակի, ոլորտում իրականացվող քաղաքականության ու առաջնահերթությունների վերաբերյալ։

ՀՀ Էկոնոմիկայի նախարարի տեղաակալները համառոտ ներկայացրել են Հայաստանի տնտեսության զարգացման գերակա ուղղությունները, նշել այն ոլորտները, որոնք առավել հետաքրքիր կարող են լինել երկկողմ համագործակցության տեսանկյունից։

Անդրադարձ է կատարվել արտահանման դիվերսիֆիկացմանն ու նոր շուկաներ մուտք գործելու կարևորությանը, ինչպես նաև փոխգործակցության հնարավորություններին ՏՏ և զբոսաշրջության ոլորտներում։

Արմեն Արզումանյանն ու Ռաֆայել Գևորգյանը նշել են, որ Հայաստանը ձգտում է ընդլայնել առևտրատնտեսական համագործակցությունը տարբեր երկրների հետ, և Էստոնիայի փորձը տարբեր ոլորտներում կարող է օգտակար լինել երկրի տնտեսության զարգացման համար։ 

Քննարկվել է նաև ՀՀ-ԵՄ Համապարփակ և ընդլայնված գործընկերության համաձայնագրի (CEPA) դրույթների արդյունավետ իրականացման ընթացքը։

Երկկողմ համագործակցությունն առավել իրական հիմքերի վրա դնելու նպատակով զրուցակիցները պայմանավորվել են հստակեցնել համագործակցության առավել նպատակահարմար ուղղությունները։

Հայդիպման ավարտին կողմերը պայմանավորվել  են երկուստեք ուսումնասիրել երկու երկրների գործարար շրջանակները մերձեցնելու և նրանց գործունեության համար նպաստավոր պայմաններ ստեղծելու հնարավորությունները: