Փետրվարի 24-ին Երևանում կայացել է հայ-ռուսական գործարար համաժողով, որի անցկացման մասին պայմանավորվածությունը ձեռք է բերվել 2021 թ․ դեկտեմբերի 22-ին ՀՀ և ՌԴ մինչև տնտեսական համագործակցության միջկառավարական հանձնաժողովի 20-րդ նիստի շրջանակներում։

Գործարար համաժողովին մասնակցում էին ՀՀ էկոնոմիկայի նախարարի տեղակալ Նարեկ Տերյանը, ՀՀ-ում Ռուսաստանի Դաշնության առևտրային ներկայացուցիչ Աննա Դոնչենկոն, պետական և մասնավոր հատվածի ներկայացուցիչներ, գործարարներ։

Համաժողովի սկզբում Նարեկ Տերյանը հանդես է եկել ողջույնի խոսքով, որի ընթացքում նշել է․ «Հայաստանի և Ռուսաստանի միջև երկկողմ առևտրատնտեսական համագործակցությունը շարունակում է թափ առնել, նաև շնորհիվ անդամակցությանը Եվրասիական տնտեսական միությանը։ Այսպես, 2019 թվականին առաջին անգամ մեր երկու երկրների միջև փոխադարձ ապրանքաշրջանառությունը գերազանցել է 2 մլրդ ԱՄՆ դոլարը, իսկ 2021 թվականին ապրանքաշրջանառության ծավալը կազմել է 2,6 մլդ ԱՄՆ դոլար»։ Նախարարի տեղակալն իր խոսքում նաև ընդգծել է, որ Հայաստանը կարևորում է Ռուսաստանի Դաշնության ընկերությունների հետ արդյունաբերական համագործակցության ընդլայնումը, մասնավորապես՝ արտադրական կոոպերացիոն կապերի հաստատման ուղղությամբ։

«Անհրաժեշտ է ակտիվացնել արդյունաբերական կոոպերացիան և համատեղ կորպորացիաների և արտադրությունների զարգացումը, իրականացնել համատեղ նորարարական նախագծեր, որոնք թույլ կտան լինել առավել մրցունակ։ Անհրաժեշտ է նաև կառուցել կազմակերպչական-լոգիստիկ շղթաներ, ստեղծել արտահանմանն աջակցող կենտրոններ փոքր և միջին բիզնեսին օժանդակելու նպատակով», - հավելել է նախարարի տեղակալը։ 

ՀՀ-ում ՌԴ առևտրային ներկայացուցիչ Աննա Դոնչենկոն իր խոսքում նշել է. «Ռուսաստանի և Հայաստանի միջև համագործակցությունը հասել է որակապես ավելի բարձր մակարդակի և արդյունավետ երկկողմ փոխգործակցություն է ծավալվել հատկապես էներգետիկայի, տրանսպորտի, արդյունաբերության ոլորտներում ներդրումային ծրագրերի իրականացման ուղղությամբ, ինչպես նաև ակտիվ համագործակցության ձևավորումը ռադիոէլեկտրոնիկայի, ՏՏ և բարձր տեխնոլոգիաների ոլորտում»։ 

Նա նաև նշել է, որ Ռուսաստանը մնում է Հայաստանի առաջատար առևտրային գործընկերը և, իհարկե, շարունակում է ավելացնել ինչպես մեքենաների, այնպես էլ արդյունաբերական սարքավորումների և հանքային արտադրանքի մատակարարումները:

Համաժողովի ընթացքում ռուսաստանցի գործարարներին «Ներդրումների աջակցման կենտրոն» հիմնադրամի ներդրումների գծով տնօրեն Արամ Վարդանյանը ներկայացրել է  շնորհանդես Հայաստանի ներդրումային միջավայրի և ներդրումների համար առավել գրավիչ ոլորտների վերաբերյալ:

Համաժողովին հաջորդել են հայ և ռուս գործարարների B2B ձևաչափով հանդիպումները, որոնք անց են կացվել «Էներգետիկա, ենթակառուցվածքների զարգացում», «Կոմունալ և գյուղտեխնիկա, հասարակական տրանսպորտ», «Բարձր տեխնոլոգիաներ և ՏՏ ոլորտ» թեմաներով։