Նոյեմբերի 26-ին  Բելառուսի մայրաքաղաք Մինսկում տեղի է ունեցել հայ-բելառուսական միջկառավարական համատեղ հանձնաժողովի հերթական՝  15-րդ նիստը։

Նիստին մասնակցել է ՀՀ էկոնոմիկայի նախարար, միջկառավարական հանձնաժողովի հայկական կողմի համանախագահ Վահան Քերոբյանի գլխավորած պատվիրակությունը, որի կազմում են պետական գերատեսչությունների պաշտոնյաներ և գործարարներ։

Նիստի բացմանն իր ողջույնի խոսքում Վահան Քերոբյանը նշել է, որ Բելառուսը և Հայաստանը Եվրասիական տնտեսական միության շրջանակներում համագործակցելու մեծ ներուժ ունեն:

«Կան շատ հարցեր, որտեղ մեր հետաքրքրությունները համընկնում են և մենք կարող ենք համատեղ առաջ մղել այդ շահերը ԵԱՏՄ-ում: Կուզեի մատնանշել մեր փոխգործակցության հնարավորությունները միջազգային ասպարեզում: Օրինակ, երեկ մենք քննարկում էինք առևտրի հնարավորությունները Իրանի, Չինաստանի և այլ երկրների հետ: Մեկ այլ կարևոր հանգամանք է Հայաստանի կառավարության ծրագրի կենսագործումը ենթակառուցվածքների և արդյունաբերության զարգացման մասով: Այդ ուղղությամբ բելառուսական ընկերությունները մեծ հնարավորություններ ունեն: Կոոպերատիվ նախագծերը հիմա առանձնահատուկ նշանակություն են ունենալու մեր երկրների համար», - ընդգծել է Վահան Քերոբյանը:

Բելառուսի անտառային տնտեսության նախարար, միջկառավարական հանձնաժողովի բելառուսական կողմի համանախագահ Վիտալի Դրոժժան իր ելույթում նշել է, որ Բելառուսը և Հայաստանը երկկողմ առևտրի ծավալներն ավելացնելու ներուժ ունեն:

«Մեր երկրների՝ Բելառուսի և Հայաստանի առևտրատնտեսական համագործակցության հիմնական առաջնահերթությունները մեր պետությունների շուկաներում բելառուս և հայ փորձագետների դիրքերի ամրապնդումն է, ապրանքաբաշխիչ ցանցի ընդլայնումը, համագործակցությունը գյուղատնտեսության, գիտության և տեխնոլոգիաների ոլորտում: Ընդ որում, ընթացիկ տարվա արտաքին առևտրի վիճակագրությունը ցույց է տալիս, որ մենք պետք է զգալի ջանքեր գործադրենք երկկողմ առևտուրը վերականգնելու և ավելացնելու համար: Ընթացիկ տարվա հունվար-սեպտեմբերի արդյունքներով երկկողմ առևտրի աննշան աճ է եղել՝ 4,5 տոկոս: Կան զգալի պաշարներ, որոնք մեր երկրները պետք է օգտագործեն փոխադարձ առևտրի ծավալները լրջորեն ավելացնելու համար», - ասել է Վիտալի Դրոժժան: Նրա խոսքով՝ ապրանքների ավանդական խմբերի մատակարարման ծավալների ավելացման հաշվին առևտրի զարգացման էքստենսիվ ճանապարհը գնալով սպառում է իրեն, ուստի՝ հարկավոր է մտնել կոոպերատիվ նախագծերի ոլորտ:

Նիստի ընթացքում քննարկվել է երկու երկրների առևտրատնտեսական համագործակցությանն առնչվող և երկուստեք հետաքրքրություն ներկայացնող հարցերի լայն շրջանակ, որոնք ներառում են արդյունաբերության, բարձր տեխնոլոգիաների, գյուղատնտեսության, տրանսպորտի, գիտատեխնիկական, կրթության, առողջապահության, մշակույթի, զբոսաշրջության, շրջակա միջավայրի պահպանության, միջտարածաշրջանային ոլորտներում համագործակցությունը և դրանց ընդլայնման հեռանկարները։ Կողմերը փոխանակել են արտահաման ներուժ ունեցող փոքր և միջին ձեռնարկությունների ցանկերը։

Նիստի ավարտին ստորագրվել է հայ-բելառուսական առևտրատնտեսական միջկառավարական համատեղ հանձնաժողովի 15-րդ նիստի արձանագրությունը, որի կետերի իրականացումը կնպաստի Հայաստանի և Բելառուսի տնտեսական կապերի ամրապնդմանը։