Հունիսի 30-ին տեղի է ունեցել Հայաստանի խաղողագործության և գինեգործության հիմնադրամի (ՀԽԳՀ) հոգաբարձուների խորհրդի հերթական նիստը, որը վարել է հոգաբարձուների խորհրդի նախագահ, ՀՀ էկոնոմիկայի նախարարի պաշտոնակատար Վահան Քերոբյանը։ Նիստին մասնակցել են նաև նախարարի տեղակալ Արման Խոջոյանը և ՀՀ սննդամթերքի անվտանգության տեսչական մարմնի ղեկավար Գեորգի Ավետիսյանը։

Ողջունելով հանդիպման մասնակիցներին՝ Վահան Քերոբյանը նշել է․ «Խաղողագործության և գինեգործության ոլորտները մեզ համար ունեն կարևոր, ռազմավարական նշանակություն, և այս ուղղությամբ մենք շատ անելիք ունենք։ Այսօրվա մեր հանդիպման հիմնական նպատակն է քննարկել խաղողագործության և գինեգործության զարգացման համար մեր նպատակներն ու նախանշենք այն քայլերը, որոնք պետք է ձեռնարկենք այդ նպատակները կյանքի կոչելու համար»։

Նիստի ընթացքում ՀԽԳՀ-ի գործադիր տնօրեն Զարուհի Մուրադյանը համառոտ ներկայացրել է հիմնադրամի 2021-2025թթ․ ծրագրերը և նշել, որ ՀԽԳՀ տեսլականն է ունենալ աշխարհագրական մակնշմամբ Հայաստանում արտադրված տեղածին խաղողի սորտերից պատրաստված պրեմիում սեգմենտի գինի, որը ճանաչված կլինի ողջ աշխարհում։

Զարուհի Մուրադյանը ներկայացրել է հիմնադրամի ռազմավարական նպատակները, որոնք ուղղված են հայկական գինու ճանաչելիության բարձրացմանը, ներքին և արտաքին շուկաներում սպառման խթանմանը։ Իրականացվող և իրականացվելիք նախագծերն ուղղված են Հայաստանում ներքին սպառման մշակույթի զարգացմանը և միջազգային շուկաներում հայկական գինիների վարկանիշի բարձրացմանը, որը, իհարկե, կնպաստի արտահանման ծավալների աճին։

«Հաշվի առնելով Հայաստանի գինեգործության պատմությունը, մշակույթն ու ներուժը, ռազմավարական պլանավորման հարցում առանցքային նշանակություն է տրվել հայկական գինիների առանձնահատկությունների վրա շեշտադրմանը»,- նշել է Զարուհի Մուրադյանը և  մատնանշել այն խնդիրները, որոնք խոչընդոտում են ոլորտի զարգացմանը, մասնավորապես նադրադառնալով հայկական գինիների որակի վերահսկման ընդհանուր համակարգի բացակայությանը, հայկական գինու ճանաչելիության պակասին և արտահանման հետ կապված խոչընդոտներին։  

Մարտահրավերների և առկա խնդիրների լուծմանն ընդառաջ՝ ՀԽԳՀ իր առջև դրել է մի շարք երկարաժամկետ նպատակներ, այդ թվում՝ «Հայաստանի գինիներ» ապրանքանիշի ստեղծում, ճանաչելիության բարձրացում, խաղողի այգիների ընդլայնում, ներքին շուկայում գինու սպառման և արտաքին շուկայում արտահանման ծավալների ավելացում, խաղողի տնկարկների ռեեստրի ստեղծում, իրավական դաշտի և որակի վերահսկման համակարգի բարելավում, մասնագետների կարողությունների զարգացում։  

Խաղողագործության և գինեգործության զարգացմանն ուղղված միջոցառումների թվում Զարուհի Մուրադյանը հատկապես կարևորել է ՀՀ խաղողագործական շրջանների խաղողի տնկարկների քարտեզագրման աշխատանքների իրականացումը,  և «ՀՀ-ի խաղողի տնկարկների կադաստրի» հիմնումը, աշխարհագրական նշումով գինիների համակարգի լիիրավ կիրարկման խթանումը, Հայաստանում առկա կոլեկցիոն, ցուցադրական այգիների և տնկարանի պահպանումը, տեղական սորտերի վիրուսազերծ շտեմարանի ստեղծումը, «Հայկական գինի» կատեգորիայի բրենդավորումը, ինչպես նաև Եվրոպայում հայկական գինիների լոգիստիկ և հաճախորդների սպասարկման կենտրոնի և վաճառքի առցանց հարթակի ստեղծումը։  

Նիստի ընթացքում քննարկվել են նաև Հայաստանում խաղողագործության և գինեգործության ոլորտների հետագա զարգացման հեռանկարները և առկա խնդիրների լուծման հնարավորությունները։