ՀՀ-ԵՄ ներդրումային համաժողովի նախապատրաստական աշխատանքներն իրականացնելու շրջանակներում, ՀՀ էկոնոմիկայի նախարարությունը Համաշխարհային բանկի խմբի հետ համատեղ կազմակերպել է «Աջակցություն ներդրումային համաժողովի նախապատրաստմանը» թեմայով աշխատաժողով-քննարկում։

Աշխատաժողովին մասնակցել են ՀՀ էկոնոմիկայի նախարարի տեղակալ Վարոս Սիմոնյանը, Համաշխարհային բանկի խմբի միջազգային փորձագետներ Վիմ Դոունը, Ռոբերտ Ուայթը, Հայաստան-Եվրամիություն ներդրումային համաժողովի կազմակերպման նպատակով ստեղծված միջգերատեսչական հանձնաժողովի անդամները և այլ շահագրգիռ կազմակերպությունների ներկայացուցիչներ։

Աշխատաժողովի ընթացքում ներկայացվել է ներդրումային համաժողովներ անցկացնելու միջազգային լավագույն փորձը՝ տեղայնացված ՀՀ-ԵՄ ներդրումային համաժողովի ձևաչափին։

Միջոցառման մասնակիցները հանգամանորեն քննարկել են կայանալիք ՀՀ-ԵՄ ներդրումային համաժողովի կազմակերպմանն առնչվող մի շարք հարցեր, մասնավորապես համաժողովի թեմատիկ ոլորտների, հնարավոր ներդրումային ծրագրերի և դրանց ներկայացման, մասնակիցների շրջանակների, միջազգային կառույցների ընդգրկվածության, գործարար համայնքի ներկայացվածության, հնարավոր օրակարգերի, հանդիպումների, համամաժողովի գործողությունների ծրագրին առնչվող, ինչպես նաև կազմակերպական բնույթի հարցեր։