#ԶրոյիցԲիզնես #ՀաջողությունՄաղթիր
«Ես զրոյից ստեղծում եմ իմ բիզնեսը, հաջողություն մաղթիր ինձ» խորագրով ներկայացնում ենք 19-րդ միջոցառման մասնակիցներին

 

Մայիսի 27-ին ՀՀ կառավարության որոշմամբ հաստատվել է կորոնավիրուսի տնտեսական հետևանքների չեզոքացման 19-րդ միջոցառումը։ Կորոնավիրուսի հետևանքով քաղաքացիների եկամուտների նվազման ռիկսերը մեղմելու նպատակով նախաձեռնած 19-րդ միջոցառումն ուղղված է ստեղծարար ներուժի իրացմանը։

Միջոցառման նպատակն է օժանդակել ՀՀ քաղաքացիներին և առանձին տնտեսվարողներին հաղթահարել կորոնավիրուսի տնտեսական հետևանքների ազդեցությունը մրցունակ գործարար ծրագրեր իրագործելու եղանակով: Միջոցառման շրջանակում նախատեսվում է ձեռնարկատիրական գիտելիքների ընդլայնման և ֆինանսների հասանելիության բարձրացման միջոցով նպաստել «զրոյից» բիզնես ստեղծելու ձգտում ունեցող շահառուների ձեռնարկատիրական գաղափարների իրագործմանը, շահառուների գործարար ծրագրերի նորարարական զարգացմանը:

«Զրոյից» բիզնես ստեղծելուն ուղղված այս միջոցառման հիմնական թիրախը մարզային ՓՄՁ-ներն ու սկսնակ ձեռներեցներն են (բացառությամբ` մանրածախ և մեծածախ առևտրի ոլորտում գործունեությունը), որոնք, հայտ ներկայացնելոu օրվան նախորդող 12 ամիսների ընթացքում ունեցել են բարվոք հարկային և վարկային պատմություն, գործունեությունն առավելապես իրականացնում են ՀՀ մարզերում և Ներդրումների աջակցման կենտրոնից չեն ստացել  ֆինանսավորում։ Միջոցառման չափանիշներին բավարարող շահառուները առցանց տարբերակով լրացնում են մասնակցության ՀԱՅՏԸ։

Ներկայացված հայտերն ուսումնասիրվում են և իրականացվում է մասնակցիների ընտրություն, որից հետո վերջիններս անցնում են թվային գրագիտության թեստ։ Անհրաժեշտության դեպքում, մինչ ձեռնարկատիրական գիտելիքների ընդլայնմանն ուղղված դասընթացը, մասնակիցներին առաջարկվում է մասնակցել թվային գիտելիքների բարելավմանն ուղղված դասընթացին։ Դրան հաջորդում է ձեռնարկատիրական գիտելիքների ընդլայնմանն ուղղված առցանց դասընթացը՝ բաղկացած չորս հիմնական ուղղություններից՝ գործառնություններ, մարքետինգ, իրավաբանություն և ֆինանսներ: Դասընթացի ընթացքում դասընթացավարները ոչ միայն գիտելիք են տալիս, այլև օգնում են մասնակիցներին իրենց գաղափարները բիզնես ծրագրերի վերածելու։ Դասընթացի ավարտին առավել հաջող և կենսունակ բիզնես պլաններ ունեցող մասնակիցներին հնարավորություն կտրվի կնքելու վարկային երաշխավորության պայմանագրեր և ստանալու բիզնես վարկեր՝ միջոցառմամբ սահմանված արտոնյալ պայմաններով:

Մինչ օրս շահառուներից ստացվել է շուրջ 634 հայտ․նրանցից 176-ը արդեն մասնակցում է դասընթացներին:

Օժանդակության գործիքների կիրառմամբ տրամադրվող վարկի պայմաններն են․  արժույթը` դրամ, ժամկետը` առավելագույնը 60 ամիս, վարկի մայր գումարի արտոնյալ ժամանակահատվածը կարող է կազմել առավելագույնը 6 ամիս` սկսնակ շահառուների համար, մեկ շահառուի վարկի առավելագույն սահմանաչափը կազմում է 10 մլն դրամ` սկսնակների համար և 20 մլն դրամ (հանրագումարով)` նորարարական զարգացման շահառուների համար, վարկի տարեկան փաստացի տոկոսադրույքը` 7- 10%։

Լրացուցիչ տեղեկությունների համար զանգահարել Ներդրումների աջակցման կենտրոն, հեռ․՝ 8105։