ՀՀ էկոնոմիկայի նախարարի տեղակալ Լիլյա Սիրականյանը դեկտեմբերի 5-ին մասնակցել է «Որակի նշան 2025» ցուցահանդեսի բացման արարողությանը։

Ցուցահանդեսը կազմակերպվել էր «ԲԻԷՍԿՈՍՄՈ» բիզնես-ակումբի նախաձեռնությամբ՝ ՀՀ էկոնոմիկայի նախարարության մասնակցությամբ, որը ցուցահանդեսին առանձին տաղավարով ներկայացրել է տնտեսության ոլորտում իրականացվող պետական օժանդակության գործիքակազմը։

Լիլյա Սիրականյանը կարևորել է այս նախաձեռնության կազմակերպումը, որը համախմբել է Հայաստանի արտադրողներին և հնարավորություն ընձեռել ներկայացնելու հայկական արտադրանքի ուժեղ կողմերը՝ բարձրորակ հումք, ժամանակակից մոտեցումներ, ստեղծարար մտածողություն և միջազգային չափանիշներին համապատասխան արտադրություն։

«Նմանատիպ հարթակների գոյությունն ու դրանցում տնտեսավարողների ներգրավվածությունը նպաստում են լավ մշակույթի ձևավորմանը՝ ունենալ այնպիսի միջավայր, որտեղ վստահության հիմնական երաշխիքը կլինի որակը, որովհետև նոր շուկաներ ներգրավելու, նոր տեղերում ի հայտ գալու, նոր հնարավորություններ ունենալու համար սա, թերևս, ամենակարևոր բաղկացուցիչն է», - նշել է Լիլյա Սիրականյանը։

Իր խոսքում նախարարի տեղակալը նաև ընդգծել է, որ Կառավարությունը վարում է այնպիսի քաղաքականություն, որն ուղղված է տնտեսավարողներին օժանդակության տրամադրմանը՝ հումքի ներմուծումից մինչև վերջնական արտադրանքի արտահանում, և ցուցահանդեսի Էկոնոմիկայի նախարարության տաղավարում ներկայացված աջակցության ծրագրերը դրա վառ վկայությունն են։