Հաջողության հասնելու նախապայմանն աշխատանքդ սիրելն է․ Էկոնոմիկայի նախարարն ընդունել է ԵՊՀ ուսանողների

ՀՀ էկոնոմիկայի նախարար Գևորգ Պապոյանը փետրվարի 5-ին ընդունել է ԵՊՀ տնտեսագիտության և կառավարման ֆակուլտետի 1-ից 4-րդ կուրսի ուսանողներին։

Հանդիպման ընթացքում նախարարը ներկայացրել է նախարարության գործառույթները, կառուցվածքը, ենթակա մարմինները։

Այնուհետև հանդիպումը շարունակվել է հարցուպատասխանի ձևաչափով, որի ընթացքում ուսանողները բարձրաձայնել են իրենց հետաքրքրող մի շարք հարցեր, մասնավորապես՝ դրանք վերաբերել են միջազգային համագործակցությանը, տնտեսության դիվերսիֆիկացման տրամաբանությանը, աշխատաշուկայի և համալսարանների կապին, դրա հնարավոր խզումների առկայությանը, ինչպես նաև ուսանողների՝ որպես նախարարության ապագա աշխատակիցներ դիտարկվելու հեռանկարին։ Նախարարը յուրաքանչյուր հարցին տվել է մանրամասն և համապարփակ պատասխաններ։

Ուսանողները հետաքրքրվել են նաև նախարարի կարիերայի ուղիով և խնդրել նրան կիսվել անձնական ու մասնագիտական հաջողության հասնելու իր փորձով և խորհուրդներով։

Նախարարն առանձնահատուկ ընդգծել է շարունակական կրթության և ինքնակատարելագործման կարևորությունը․ «Հաջողության հասնելու հիմնաքարերից է նաև աշխատասիրությունը, ոչ միայն աշխատել սիրելը այլ նաև աշխատանքդ սիրելը, քանի որ առանց դրա հնարավոր չէ հասնել դրական արդյունքների»,- նշել է նախարարը։