Մարտի 14-ին Սպառողների իրավունքների միջազգային օրվան նվիրված միջոցառմանը մասնակցել և ելույթներով են հանդես եկել ՀՀ վարչապետ Նիկոլ Փաշինյանը, ՀՀ էկոնոմիկայի նախարար Գևորգ Պապոյանը, Հայաստանում ԵՄ պատվիրակության ղեկավար, դեսպան Վասիլիս Մարագոսը, Մրցակցության պաշտպանության հանձնաժողովի նախագահ Գեղամ Գևորգյանը, Աժ տնտեսական հարցերի մշտական հանձնաժողովի նախագահի տեղակալ Բաբկեն Թունյանը, պետական և մասնավոր հատվածի այլ ներկայացուցիչներ։

Գևորգ Պապոյանն իր ողջույնի խոսքում, մասնավորապես, նշել է․ «Մենք մեր առջև դնում ենք նպատակ՝ ստեղծել միջավայր, որտեղ յուրաքանչյուր սպառող կարող է վստահ լինել, որ մրցակցությունը հավասար է, իրավունքները՝ պաշտպանված, ապրանքները, ծառայությունները՝ և՛ ապահով և՛ որակյալ։ Սա, առաջին հերթին, նպաստում է բարեխիղճ տնտեսական գործունեության առաջընթացին և երկրի ընդհանուր տնտեսության զարգացմանը»։

Նախարարը նաև նշել է, որ Էկոնոմիկայի նախարարությունը, համագործակցելով Մրցակցության պաշտպանության հանձնաժողովի հետ, արդեն մշակել և շրջանառության մեջ է դրել ռազմավարական օրենսդրական փաթեթ, որի առաջնային համարվող փոփոխություններից է սպառողների շահերը պաշտպանող կենտրոնական մարմնի լիազորությունների հստակեցումը։

Միջոցառման շրջանակում կազմակերպվել է «Սպառողների պաշտպանության կենտրոնացված համակարգի ներդրումը ՀՀ-ԵՄ ՀԸԳՀ համաձայնագրի շրջանակներում. հեռանկարներ և մարտահրավերներ» պանելային քննարկում, որին մասնակցել և ելույթով հանդես է եկել ՀՀ էկոնոմիկայի նախարարի տեղակալ Լիլյա Սիրականյանը։

Միջոցառումն իրականացվել է Մրցակցության պաշտպանության հանձնաժողովի նախաձեռնությամբ ՀՀ-ԵՄ Համապարփակ և ընդլայնված գործընկերության համաձայնագրով նախատեսված սպառողների իրավունքների պաշտպանության ոլորտում իրականացվող օրենսդրական և ինստիտուցիոնալ բարեփոխումները հանրության լայն շրջանակներին իրազեկելու նպատակով: