Նախարար Վահան Քերոբյանը հունիսի 23-ին ընդունել է Ուդմուրթական Հանրապետության էկոնոմիկայի նախարար Միխայիլ Տումինի գլխավորած պատվիրակությանը։
Հանդիպմանը ներկա էին նաև նախարարի տեղակալներ Արմեն Արզումանյանը, Արման Խոջոյանն ու Նարեկ Տերյանը։
Վահան Քերոբյանը ողջունել է հյուրերի՝ Հայաստան այցելելու և տեղում համագործակցության հնարավորությունները դիտարկելու նախաձեռնությունը։
Կողմերը քննարկել են Հայաստանի և Ուդմուրթական Հանրապետության միջև տնտեսական կապերի զարգացմանը, գործարար կապերի ընդլայնմանն ու առևտրաշրջանառության ծավալների ավելացմանն առնչվող հարցեր։
Միխայիլ Տումինը ներկայացրել է Ուդմուրթական Հանրապետության արտահանման աճի ներուժ ունեցող արդյունաբերության ճյուղերը, հատկապես առանձնացնելով կահույքագործության, մետաղագործության, մեքենաշինության և գյուղանտեսության ոլորտները և տեղեկացրել, որ իրենց պետությունը գործարար միջավայրի բարելավմանն ուղղված մի շարք ծրագրեր է իրականացնում։
Վահան Քերոբյանն իր հերթին պատրաստակամություն է հայտնել անել հնարավորը՝ տնտեսական ոլորտում հայ-ուդմուրթական համագործակցության հետագա զարգացման համար, ինչպես նաև նպաստել գործարար համայնքների ներկայացուցիչների միջև նոր անմիջական շփումների հաստատմանը։ Այդ համատեքստում, տեղի է ունեցել մտքերի փոխանակություն, ներկայացվել են տարբեր դիտարկումներ և առաջարկություններ: